أمي بتسأل

أمي طرحت سؤال بعد ما كنا نتفرج على برنامج "خواطر" وحكتلي: فيش موقع على الانترنت بيقدر الواحد يسأل فيه اللي بده اياه؟ فأنا قررت أحط سؤالها هون .. بس قبل ما أسأل بدي أشرحلكم شو الجو اللي احنا كنا فيه عشان تعيشو معانا.

كنا بنتفرج على حلقة خواطر على قناة الرسالة عن الأكل بالمدارس .. وأمي كل شوي تتحسر وتقارن بينّا وبينهم وتقوللي انه هاي الأشياء صعب نقدر نطبقها عندنا.. واحنا منفرج غيرت شوي على قناة الأردن وشفنا الأخبار .. كانوا عاملين تقرير عن المدارس :/ وانهم مغيرين بالمناهج و انه "بطل فيها زخم زي زمان ولا تكرار وهالحكي الفاضي" ..أساسا منظر الصف الأردني بعد ما كنا نتفرج على الصف الياباني كان غير مشجع. رجعنا على برنامج خواطر ..وكانوا بناقشوا انه اليابانيين ما بخلوا أكل زايد بصحونهم ..وقارنوهم بالعرب والمسلمين.. أمي وهي تتفرج على الأكل اللي بكبوه بالزبالة عصبت عن جد ..وقلتلي انه هيك كانت المناظر لما راحوا على الحج .. ناس بتحط بصحونها أشياء كثير وما بيوكلوا منه اشي .. وهاي هيك هم بالحج والمفروض انهم يتبعوا شرائع الدين.


بعدين طرحت السؤال اللي بدها تعرف جوابه :

هسه أمريكا لما حاربت اليابان وحاولت تقمعها .. كيف ما نجحت وقدروا اليابانيين يحافظوا على تقاليدهم ويطوروا أنفسهم ويعملوا نهضة؟ بينما احنا أي عمل بوجهوه ضدنا بنسكت وبنرضخ .. وبينجحوا بأنهم يمحوا هويتنا ويخلونا نعرقل بعض ونصير بالحالة اللي احنا فيها؟ ليش اليابان صمدت واحنا لأ؟ مع انه احنا أمة الأخلاق والعلم والحضارة.

امبارح حضرنا محاضرة للشيخ عمر عبدالكافي .. ومع انه القاعة كانت مليانة على الآخر على أساس انه الناس مهتمة تحضر.. فيه كان ناس عاملين دوشة والأولاد الصغار بصيحوا وناس بتحكي بالتلفونات أثناء المحاضرة.. وبس خلصت المحاضرة الكل ما صدق ويروح. أمي طبعا اتذكرت أحداث المحاضرة تبعت امبارح وصارت تقوللي انه حتى بالأشياء الدينية ما عندنا فيها اهتمام أو تنظيم .

*******************************************************

اشي ثاني.
أنا الي من أول رمضان تقريبا بحالة غيبوبة .. يعني أول يومين كنت مش متعودة وكنت أتعب بسرعة .. بعدين لما تعودت على قلة الأكل والشرب صرت أي لقمة آكلها أو حتى شوية مي أشربها تعمللي حرقة ... وبطلت أعرف آكل بزيادة وأظلني طول اليوم منهارة وما أعمل اشي..عشان هيك ما قدرت أقرأ مواضيع كثير كتبتوها .. مع اني كنت أحاول أتابع الأخبار بس ما في فايدة.
إن شاء الله بحاول أقرأ وأعلق على المواضيع اللي بلحقها .. وإن شاء الله ببطل الكومبيوتر يعلق كل شوي ... فاعذروني.
انتو بس ردوا على سؤال أمي ... وبعدين بنتفاهم :-)

بدأنا رمضان وكل عام والكل بخير..والله يتقبل منا ومنكم :)

طبعا كالعادة أنا ناوية أقيم الليل وأقرأ قرآن، وبحلم أني أختم القرآن أكثر من مرة ... مع اني عارفة اني رح أتحمس أول ثلاث أيام وبعدين رح يبدا الحماس والنشاط يقل ... وبيرجع بالعشر الأواخر وتحديدا ليلة 27 اللي الكل بذوب دين فيها :)
طبعا هاي الحالة بتصيب ناس كثيرين،غير الأولاد الصغار اللي بصيروا يصلوا التراويح ويصحوا على السحور بنية الصيام.. بعدين بزهقوا وبينسوا الموضوع :)

بس إن شاء الله، إن شاء الله هاي السنة رح أكون أحسن ... وأنا بكتب قدامكو كلكو هون علشان يكون زي حافز والتزام.

امبارح حاولت "أتحرى هلال رمضان" زي كل سنة ... بس هاي المرة قررت أصور يمكن أشوفه أحسن.. طبعا ما شفتش اشي بس صرت بالغروب.
بس قبل ما أحطلكو الصور ، فيه صورة لإيناس عن شهب البرشاويات ..انسيت أحطها من قبل :/ ... انا ما شفت الشهب و مش عارفة هو هيك كان شكلهم ولا إيدي اهتزت:




وهاي صورة الغروب لويسبر :





وأنا بصور من السطح ضربوا المدفع عند التل .... فهاي الصورة لمحمد ..لو دققت بالصورة بتشوف دخان المدفع :





وهاي الصورة عجبتني فهي الكو كلكو :)

ويكيبيديا .. ؟!

بعرف أنه كثير ناس بحبوا ويكيبيديا ويعتمدوا عليها بالمعلومات كثير. بس أنا ما بحبها بصراحة . وقبل ما تكرهوني ( عأساس انكم بعدكم ما كرهتوني ) خلوني أعبر عن رأيي وأقرؤوه للآخر.

أنا كثير مرات لما أكون أدوّر على معلومة بفتح على ويكيبيديا. بس فيها أشياء بتقهرني. كثير من قوانينهم بحس ما إلها معنى وبتتعارض مع المبدأ الأساسي للموسوعة و هي كونها حرة ، وأي حدا بيقدر يحرر فيها وبتتوافق مع رخصة جنو والمصادر الحرة وبعرفش شو. يعني أنا مستوعبة أنه أي مشروع لازمه قوانين تنظمه وبدون هالقوانين بتصير الأمور ضايعة والجهود ما الها فائدة. بس مش بقوانينهم اللي بطبقوها إداريين كثير من قراراتهم شخصية حسب رأيي ، وما بتخدم الهدف وبتتحول لنزاعات و جدال ما اله داعي.

أنا اجتني فترة وكتبت أكم موضوع على ويكيبيديا واتحمست الها. بس بالآخر قرفت من كثير شغلات. اذا اثنين صار بينهم خلاف بعملوا مشكلة وبقترحوا قانون جديد. واذا فيه قانون بعملوا عليه تصويت ومش أي حدا بصير أنه يصوت. وإذا إداري ما عجبه اشي بروح بطبق القانون اللي بده اياه. واذا واحد كتب سؤال بصفحة النقاش بعترضوا لأنه لازم يكتبه عند الأسئلة. واذا واحد ما عجبوا المقال المكتوب بغير فيه على كيفه ويمكن يغيره كله. يعني فتحت على موضوع كنت أنا اللي بدأت صفحته لقيته ما فيه كلمة من اللي أنا كتبتهم وكل اشي فيه متغير ، اذا حتى مغيرين طريقة كتابة التاريخ :/ يعني هاي الشغلة كثير مزعجة لما ييجي واحد يمحي اللي كتبته ويرجع يكتب زي ما بده والواحد حاس انه مجهوده ضاع.
واشي ثاني ما بحبه بويكيبيديا تابع للي كتبته فوق، أنه اي واحد بيمحي اللي مش عاجبه وبيكتب اللي هو مقتنع فيه بعتبر انه رأيه الصح. ومرات بقرروا أنهم يحطوا بالمقال الآراء المختلفة كلها ومرات لأ. أنت وحظك. علشان هيك بحس أنه مواضيعهم ما بيقدر الواحد يعتمد عليها لأنه بتكون ناقصة معلومات ومش شاملة لكل الموضوع. خصوصا بمواضيع السياسة والتاريخ واي اشي بتعلق بالثقافة. بس المعلومات العلمية فيها كثير وضعها أحسن. يعني ويكيبيديا مصدر ممتاز علشان الواحد يبدأ فيه ويوخذ فكرة عن موضوع بشكل عام ، بس ما بيقدر يعتبره مرجع وحيد وصحيح.

يوم الخميس بعرفش شو اللي وصلني على ويكيبيديا وكنت زهقانة على الآخر ، فصرت أتبايخ وشكلي عملت بلبلة. محيت صفحة من اللي مكتوب فيها ( هالة كيرليان ) وقلت لحالي مش مشكلة بيقدروا يرجعوها وعملت حركات ثانية. أنا بعتذر من الجماعة بس عن جد كنت زهقانة وحبيت أعرف كيف رح يتفاعلوا. بصراحة كنت متوقعة أنهم يرشدوني أكثر على اعتبار اني شخص ما بعرف بويكيبيديا ونازلة أكتب عجايب ، بس يعني هم كمان عندهم مليون واحد مش فاهم اشي ومش ناقصهم وحدة زيي (بعرف إني مجنونة) :

اللي بده يتمصخر علي، أو يعترض وما أعرف أرد عليه، أو أي حدا ما بعجبني اللي كتبه رح أشطب تعليقه ؛-)
بمزح :-) ( مزحي بايخ .. كمان مرة بعرف ) ، اكتبوا اللي بدكم اياه وخذوا راحتكم ، بس احتمال كبير ما أعرفش أرد عليكم. هيك أنا حاسة.

احزروا مين طعماني حلوان فوزه ؟

يالله احزروا :) ...

مين فازبمسابقة وعمل كوكيز وأكلت حصتي منه .. وكنت بدي آكل عنكو كمان بس ما قدرت.
المهم إني أمنت حق صوتي D:


الجواب : إيناس ؛)

رحت أدور عليها بالجامعة عشان آكل الحلوان بناء على اتفاق مسبق ... بس يعني لابعرفها ولا بتعرفني .. كنت أطلع على الناس أدور على وحدة بعرفهاش بس احتمال تكون إيناس .. وأحس انه الكل بيطلع علي ... فشكيت بالكل ... ظليت أدور بالممرات بعدين قررت وقفت عند قاعة محاضرتهم " زي اللي مضيع أمه" والكل بعده بيتفرج علي ... بعد شوي اجت وحدة من الأفق وطلعت إيناس :)
تعرفنا عالسريع أو بالأحرى اتأكدنا من بعض ... والغريب اني كنت حاسة حالي بعرفها فكنت بحكي عادي ... اجو صاحباتها وصاروا يباركولها ... وطعمتنا "كوكيز" عامليته بنص الليل زاكي كثير ... بس الله يسامحه دكتوري الأسنان امبارح عجب علي ... فاضطريت أمص تبعتي مص ... المهم

يسلموا ايديها وألف ألف مبروك :)

(ملاحظة : أنا كان لازم أكتب هالبوست بس اروح ... بس رحنا مشوار طوييييل وهسه بس فضيت)

أم علي ..!

هاي صورة لأم علي :) ... مش قصدي أم علي طبق الحلو (بعطيكم الوصفة إذا بدكم ) ... أنا قصدي هاي الحشرة اللي بتشوفوا صورتها ..احنا منسميها أم علي .. وحابة اعرف انتو شو بتسموها.
أم علي والليدي بيرد (بعرفش شو اسمها بالعربي ؛) ) هم الكائنين الوحيدين اللي بحبهم من عالم الحيوان واللي مستعدة أمسكهم بدون قرف (بمسك النمل كمان بس ما بحبه ) .. المهم انتو شو بتسموها هاي الحشرة؟

Moon with Clouds

I want your suggestion and your opinions.

I wanted to take a photo of the moon with the clouds surrounding it. But this is what I got : Clear Moon (without clouds) , Dark Moon (without clouds too) or a strange "Moon with clouds" photo

My camera is Canon powershot SX100 *

عقدة التصوير

أنا مثلي مثل 90 % من البشر ، هوايتي التصوير ، بالإضافة إلى جمع الطوابع والعملات :)
بدأ حبي للتصوير في سن مبكرة، والفضل في ذلك يعود لشقيقي الأكبر الذي كان يهوى التصوير أيضا . والحقيقة أن أخي لم يعلمني التصوير ولم يعطيني أي نصيحة في هذا المجال ، بل على العكس ، كان إذا ما رآني بالقرب من الكاميرا "مسح في الأرض وبهدلني" :(
وعلى الرغم من أني كنت أطلب منه السماح لي بالتصوير قائلة :"خليني أصور ول".
كان يرد: "لأ بتخربي الكاميرا".
فأجيب : "طب قوللي شو أعمل وما بخربها".
فيرد بحزم : "خلص روحي".
ومن هنا نشأ حبي للتصوير والرغبة الحقيقية في أن أمسك كاميرا بيديّ ، من باب "كل ممنوع مرغوب".

وعلى الرغم من امتلاكي لكاميرا خاصة بي الآن ، وهي هدية من شقيقي الأصغر :) وتصويري لآلاف الصور (بكاميرتي وبكاميرات الآخرين) إلا أن صوري ليست بهذا الجودة. في الواقع هناك ثلاث صور جيدة من هذه الصور . واحدة التقطها بالخطأ ، وأخرى التقطها بعد ربع ساعة من الصراخ و "بوس الإجرين انه ما حدا يتحرك"، والأخيرة لا أعرف من التقطها :/

كنت أظن دائما أنني أجيد التصوير، وبأن التصوير أساسا في غاية السهولة . كل ما علي هو أن أضغط على زر الكاميرا لأصنع عمل فني رائع. وكنت فخورة حقا بنتاج تصويري واقتنعت تماما أن هذه هي الهواية المناسبة لي . خصوصا أنني أدركت أنني لا أجيد الرسم وأن خطي بالكاد يُـقرأ ، كما أنني لا أتذوق الموسيقى ، ولقناعتي أن كل إنسان يجب أن يكون له جانب إبداعي في شخصيته . وكثيرا ما أمضيت الوقت على الفوتوشوب و برامج معالجة الصور وأنا أتعلم ذاتيا ما يمكن أن تصنعه هذه البرامج بالصور. لكنني انتبهت بعد وقت طويل أن البعض يلتقطون صورا غاية في الروعة . فقررت تقليد صورهم ولكن هذه الطريقة لم تنجح . فبدأت أقرأ عن التصوير وعن فوائد الأزرار الموجودة على الكاميرا والتي لا أستخدمها ولم أفكر باستخدامها :/ . وانبهرت عندما علمت أنواع العدسات تختلف باختلاف الهدف المراد تصويره. و أن هناك شروطا لكل صورة هي التي تحدد ما إذا كان ينبغي استخدام فتحة عدسة ضيقة أو سرعة غالق سريعة أو ISO منخفض. إلا أنني ما زلت لا أعرف تماما متى يجب أن أستخدم كل شرط وكيف .
ولهذا سأضع بعض صوري التي أريدها أن تبدو أفضل، والتي أرغب في سماع ما لديكم في كيفية التقاطها جيدا في المرة القادمة إن شاء الله :)

أفكار عن الزواج

بعد ما كتبت ويسبر موضوع هون ..ومن ورا سلسلتها ومواضيع مياسي عن العرسان .. والسوالف اللي الواحد بيسمعها هون وهناك عن الجيزة..قررت أكتب تساؤلاتي.

هل الزواج ضروري؟ ..أو بالأصح شو لازم تكون دوافعه؟ انه الواحد بده يستقر ..أو الواحد جاي عباله يحب ويجوز..ولا بده ييجيه أولاد..ولا بده يكون استقلاليته بتكوين عيلة.. ولا بده يخلص من الناس اللي حواليه.

ليش كل الناس بحبوا يجيبوا سيرة العرايس للشب أو يسألوه : ما لقيتش عروس؟ أو خليهم يدورولك !.. وقدام البنت كل حكيهم فلانة اتجوزت واحد كبير بالسن أو مادياته مش كثير ( أو اي اشي ) علشان بدها تتجوز أو هي كبرت وبدها تنستر (كأنها كاينه صايعة) وهالسوالف اللي بتقهر..واللي بقهر فيها طريقة العرض.. وانه أساسا البنت مش بايدها هالموضوع .. والشب مش عارف يلاقي بنت الحلال اللي يوافقوا عليها كل العيلة.
مثلا ..كل ما عمي يشوف حدا من عيلتنا بيسأل: ما لقيتوش عروس لفلان (اللي هو أخوي).. وبوجهلي الحكي انه ليش ما بدورله بما اني بعرف وبشوف بنات...الجواب بكون دايما انه أخوي ما بده (هو هيك بحكي) وأساسا أنا مش مستعدة أدورله لأنه المواصفات اللي بده اياها مش عاجبيتني :) ..والله ،لما الواحد يدور لحدا ثاني بكون يدور على زوقه هو بس بعرفش ليش الكل بطنش هاي الحقيقة..ويستمروا بالتفكير بعرايس أو عرسان لناس ثانيين.. ويذكروا أهلهم انه يجوزوا ولادهم .. شو فكرهم انه الأهل ناسيين أو ما خطرتلهم الفكرة .. او ناويين يحتفظوا باولادهم الهم للأبد.. أو انه يمكن الشب مستحي يقول انه بده يتجوز .. يعني بالله ما استحاش من كل الأشياء اللي بيعملها واجا عهاي واستحى.

فأنا والله بتساءل.. يعني لو انا ما اجانيش النصيب شو بصير بالدنيا؟ هيني عايشة عند أهلي ومبسوطة عالآخر الحمدلله .. والجيزة كلها وجع راس (دايما هيك اللي بشوفه .. خصوصي الناس اللي بدهم غيرهم يتجوزوا بحسهمش عايشين هالسعادة لحتى يقنعوا غيرهم بالموضوع)..
ومرات بحكي لحالي انه لازم الكل يتجوز هاي سنة الحياة.. وانت شو بدك تظللي عايشة بهالدنيا اذا ما ظللك حدا (أساسا هاي هي الفكرة اللي بلعبوا عليها مع البنات دايما).. أو أتجوز واحد كويس وأعيش معاه مبسوطة بس كيف بدي ألاقيه .. وأساسا شو هي المواصفات اللي بتخللي حدا كويس (بس هذا موضوع ثاني وكبير)..

يعني من الآخر اللي ما اتزوجش شو راح عليه؟
هو بالله حدا يحكيلي..لأني صايرة أفكر بدون ما أصل لنتيجة.

**************************

للي حاب ينسى القرف اللي حطيته فيه يقرأ شو لقيت عند علاء الدين عن هالموضوع.

وبالآخر شكرا كثير يا ويسبر ..لأنه عن جد فشيت قلبي D:

Everybody knows that :-)

كوني تعلمت كيف الواحد بحط على مدونته فيديوهات وأغاني من مواقع مختلفة .فشكلي رح أصير أستخدمها كثير .
شفت هالفيديو وحبيت أحطه هون :

which one is throwing the rocks ..كل اللي معلق بمخه انه في ناس بترمي حجار..بس شو القصة أساسا مش هاميته.

الخديعة

نشر في جريدة الرأي ، هنا

جامعي يوهم اسرته بدراسة الطب ويوم التخرج اختفى عن الانظار

اربد - جهاد دراوشة - لم يعلم ولي امر احد طلبة جامعة العلوم والتكنولوجيا الذي يدرس الطب في الجامعة منذ العام 2004 ان حضوره لحفل تخرج فلذة كبده سيفضي الى ما يدمي النفس ويترك فيها الكثير من الهموم بعد ان اكتشفت الاسرة ان ابنها لا اسم له في سجلات الخريجين وانه مفصول من الجامعة في وقت كان يتقاضي فيه رسوم العام الدراسي كاملة علاوة على منحه سيارة خاصة وكل المتطلبات الشخصية .وفي التفاصيل ان الاجهزة الامنية في شرطة محافظة اربد تبحث راهنا عن شاب اختفى عن الانظار منذ ثلاثة ايام بعد ان ترك سيارته وجهازه الخليوي موجود فيها.ووفق مصدر امني مسؤول فإن المختفي كان اوهم ذويه بانه يدرس الطب في الجامعة وكان يبعث لوالده كشوفات علامات من الجامعة مزوره ليتمكن من الحصول على اقساط الدراسة الفصلية ومصروفه الشخصي .وكانت المفاجأة التي اذهلت ذويه عندما قدم اليهم اربع بطاقات دعوة لحضور حفل تخرجه من الجامعة ليتبين لهم ان ابنهم ليس من بين الخريجين بعد ان تليت اسماء جميع خريجي كلية الطب الذين ينادى عليهم عبر مكبرات صوتية في الحفل .ولدى مراجعة ذوي الطالب لادارة الجامعة تبين ان ابنهم مفصول من الجامعة منذ العام 2004 الامر الذي جعلهم موضع استغفال مدته خمس سنوات وما زاد من ذهولهم اختفاء ابنهم عن الانظار منذ ثلاثة ايام جعلهم في هم اخر عنوانه التخوف من ان يكون مكروها قد وقع للشاب .

Better on the Other Side - Tribute to MJ

Better On The Other Side (Tribute to MJ) - The Game ft. Chris Brown, Diddy, Polow Da Don, Mario Winans, Usher, Boyz II Men

'Alice in Wonderland'

لقيت على Yahoo انهم عاملين فيلم جديد عن" أليس في بلاد العجائب"
أنا أساسا كنت أحبه كثير لما كان ييجي واحنا صغار
كنت زي كل الصغار بحس انه آه عن جد فيه عالم خفي بمكان ما احنا مش عارفين عنه

المهم اللي عجبني هاي المرة الصور تبعت أبطال الفيلم




طبعا أنا شفت صورة جوني ديب وانبهرت انهم كيف بيقدروا يتخيلوا شخصيات الها أشكال وألوان غريبة
هذا النوع من " الفنطزية "(Fantasy) هو أكثر اشي بحبه بأفلام الأطفال

I've just found out

This Honey Mustard Sauce is "Really" good... or maybe I was too hungry.

And by the way.. I eat like babies

بدون عنوان

منذ احتلال الغاصبين ونحن نبحث في السياسة

شأن الضمير مع السياسة كالرقيق مع النخاسة

مرت علينا ست عشرة كن مجلبة التعاسة

فإلى متى يا ابن البلاد وأنت تؤخذ بالحماسة

وإلى متى زعماء قومك يخلبونك بالكياسة

ولكم أحطنا خائنا منهم بهالات القداسة

ولكم أضاع حقوقنا الرجل الموكل بالحراسة

والله ليس هناك إلا كل قناص الرئاسة

تأتيه من بيع البلاد وما إليه من الخساسة

وإذا اتقاك فبالجرائد والنجاسة للنجاسة

من شعر إبراهيم طوقان