الجمعة، 4 أيلول، 2009

أمي بتسأل

أمي طرحت سؤال بعد ما كنا نتفرج على برنامج "خواطر" وحكتلي: فيش موقع على الانترنت بيقدر الواحد يسأل فيه اللي بده اياه؟ فأنا قررت أحط سؤالها هون .. بس قبل ما أسأل بدي أشرحلكم شو الجو اللي احنا كنا فيه عشان تعيشو معانا.

كنا بنتفرج على حلقة خواطر على قناة الرسالة عن الأكل بالمدارس .. وأمي كل شوي تتحسر وتقارن بينّا وبينهم وتقوللي انه هاي الأشياء صعب نقدر نطبقها عندنا.. واحنا منفرج غيرت شوي على قناة الأردن وشفنا الأخبار .. كانوا عاملين تقرير عن المدارس :/ وانهم مغيرين بالمناهج و انه "بطل فيها زخم زي زمان ولا تكرار وهالحكي الفاضي" ..أساسا منظر الصف الأردني بعد ما كنا نتفرج على الصف الياباني كان غير مشجع. رجعنا على برنامج خواطر ..وكانوا بناقشوا انه اليابانيين ما بخلوا أكل زايد بصحونهم ..وقارنوهم بالعرب والمسلمين.. أمي وهي تتفرج على الأكل اللي بكبوه بالزبالة عصبت عن جد ..وقلتلي انه هيك كانت المناظر لما راحوا على الحج .. ناس بتحط بصحونها أشياء كثير وما بيوكلوا منه اشي .. وهاي هيك هم بالحج والمفروض انهم يتبعوا شرائع الدين.


بعدين طرحت السؤال اللي بدها تعرف جوابه :
هسه أمريكا لما حاربت اليابان وحاولت تقمعها .. كيف ما نجحت وقدروا اليابانيين يحافظوا على تقاليدهم ويطوروا أنفسهم ويعملوا نهضة؟ بينما احنا أي عمل بوجهوه ضدنا بنسكت وبنرضخ .. وبينجحوا بأنهم يمحوا هويتنا ويخلونا نعرقل بعض ونصير بالحالة اللي احنا فيها؟ ليش اليابان صمدت واحنا لأ؟ مع انه احنا أمة الأخلاق والعلم والحضارة.



امبارح حضرنا محاضرة
للشيخ عمر عبدالكافي .. ومع انه القاعة كانت مليانة على الآخر على أساس انه الناس مهتمة تحضر.. فيه كان ناس عاملين دوشة والأولاد الصغار بصيحوا وناس بتحكي بالتلفونات أثناء المحاضرة.. وبس خلصت المحاضرة الكل ما صدق ويروح. أمي طبعا اتذكرت أحداث المحاضرة تبعت امبارح وصارت تقوللي انه حتى بالأشياء الدينية ما عندنا فيها اهتمام أو تنظيم .


*******************************************************

اشي ثاني.
أنا الي من أول رمضان تقريبا بحالة غيبوبة .. يعني أول يومين كنت مش متعودة وكنت أتعب بسرعة .. بعدين لما تعودت على قلة الأكل والشرب صرت أي لقمة آكلها أو حتى شوية مي أشربها تعمللي حرقة ... وبطلت أعرف آكل بزيادة وأظلني طول اليوم منهارة وما أعمل اشي..عشان هيك ما قدرت أقرأ مواضيع كثير كتبتوها .. مع اني كنت أحاول أتابع الأخبار بس ما في فايدة.
إن شاء الله بحاول أقرأ وأعلق على المواضيع اللي بلحقها .. وإن شاء الله ببطل الكومبيوتر يعلق كل شوي ... فاعذروني.
انتو بس ردوا على سؤال أمي ... وبعدين بنتفاهم :-)

هناك 44 تعليقًا:

قط البكتريا يقول...

انا من فترة خارج نطاق التغطيه بقراء مرات وبمر مرور الكرام ما بعلق بس حبيت اعلق على الموضوع .
رائيي بالموضوع ناس كتتير ما بتقبلو وبتستغبيه بس انا مقتنع فيه .
بتعرفي انو اليابانين درسو تجربة محمد علي الكبير وطبقوها باليابان , كتتير فيه تشابه بينا بس الي خلي اليابان تحافظ على تقاليديها ووضعها سببن
الاول انو اليابان بلد بعيد مش بمنطقة استراتيجيه يعني بالغالب ما في اطماع كبيرة واحنا العكس نص العالم وكل ما تصير امبارطورية بالتاريخ بتصير تفكر في مين بدنا ندق اول اشي مين مين مين ... اها العرب

ثانيا انو الله مبتلينا بالثروات الطبيعه يعني الكل بتكالب على المنطقة
والي معو فلوس فينا معتمد عليها ومش مهتم يطورو حالو

عفكرة احنا كشعب وكاشخاص اذكياء وفعالين فرديا وللاسف فقدنا الانتماء للمجموعه ولاحترام للشخص

hamede يقول...

الكاتب الياباني نوبوأكي نوتوهارا

يقول و هو يصف أحد زياراته لأحد أصدقائه العرب


المدخل كان قذرا و الدرج ايضا و لكن لدهشتي فقد وجدت عالما آخر خلف باب صديقي،كان البيت نظيفا للغاية مرتبا و أنيقا و مريحا لقد فهمت أن كل ما يخص الملكية العامة يعامله الناس كأنه عدو فينتقمون منه و لذلك نجد المقاعد في الأماكن العامة مكسرة أو مخلوعة و نجد معظم مصابيح الشوارع محطمة…لقد فكرت طويلا في ظاهرة تخريب الممتلكات العامة و فهمت أن المواطن العربي يقرن بين الأملاك العامة و السلطة و هو نفسيا في لا وعيه على الأقل ينتقم سلبيا من السلطة القمعية فيدمر بانتقامه وطنه و مجتمعه بدلا من أن يدمر السلطة نفسها تلك مظاهر السلبية التي ذكرتها إختفت تماما من المجتمع الياباني


و في كلامه عن الديموقراطية في العالم العربي


إنني شبعت من كلمة ديموقراطية و كل من له علاقة بالكتاب العرب يعرف معنى التخمة من كلمة ديموقراطية و هذا الشبع الزائد الزائف يدل بوضوح على غياب الديموقراطية،فثلا تجلس مع كاتب يتحدث عن الديموقراطية بلا تعب ثلاث ساعات ولا يعطي مجالا لأحد من الحاضرين بالكلام عمليا هو يمارس الدكتاتورية أو على الأقل سلطة النجم و مع ذلك يشكو من غياب الديموقراطية أظن أن هذا النوع من الكتاب يشكو من الحاجة لمنصب رفيع في السلطة ، كلمة ديموقراطية أصبحت تميمة يرددها الجميع و يحملها الجميع بمن فيهم رجال السلطة الحاكمة ووسائل الإعلام العربية و الرسمية

Whisper يقول...

انا مش كتير خبيره بهالامور لكن من وجهه نظري ان مشكلتنا بالبلدان العربيه ان الكل ما عنده انتماء الا لنفسه, وكل شخص عايش من اجل نفسه و بمبدأ انا ومن بعدي الطوفان

عنا المعظم اناني و بدو الحصه الاكبر لنفسه حتى بابسط الاشياء متل الاكل

محمد سعيد يقول...

بكره تتعدل بإذن الله.
--
وسلامتك يا حالمة.. ممكن تشربي لبن كتير عشان الحرقة دي وشوية سكريات في السحور عشان تفوقي في النهار

وخير إن شاء الله. =)

Amjad Wadiِ يقول...

سلامتك يا دريمي زز ان شاء الله ربنا بجازيك بدل المشقة

احكي لأمك مش جاية تقارن غير باليابان ...

sozan يقول...

مش عارفه شو احكي لكن السؤال في محله

Dreamy Villager يقول...

قط البكتيريا ...
لما حكيت لأمي عن التعليقات ... قلتلي التعليق الأول بشبه اللي كنا نحكي فيه كأنه كاين معنا ، وشافت انه أنت أكثر واحد فاهم علينا...أمي وأنا لما تناقشنا اقتنعنا بفكرة انه أمريكا مش هامها كل العالم بس مهتمة فينا بالتحديد ...لأننا لو نجحنا ممكن ندير العالم.


hamede...
أمي أعجبت برأيك كثير ... هي ما حكت اشي محدد أرد فيه...بس بتوافق تماما على فكرة انه الأملاك العامة غير محترمة عندنا... وأنا كمان عجبتني هاي الفكرة.. وبصراحة أول مرة بنتبهلها.


Whisper...
أمي بتوافقك الرأي كمان... ما حكت اشي محدد بس أومأت برأسها انه حكيك صحيح.


محمد سعيد...
ان شاء الله ...أمي ما ردت عليك باشي خصوصي :)
الله يسلمك...فعلا والله أنا بنسى اللبن بعد الفطور...وعلى السحور بآكل وأنا نايمة..إن شاء الله بتّبع نصائحك.


Amjad Wadi...
الله يسلمك...وإن شاء الله الله بيغفرلنا جميعا .
أمي ضحكت على تعليقك وبتحكيلك :"لعاد بشو نقارن ...بالدول الناكتة".


sozan...
والله فعلا الواحد مش عارف شو بده يحكي بعد اللي بشوفه.
وكمان مرة أمي ما ردت باشي محدد عليك...اللي ما بجاوب ما بنرد عليه ؛)

Naryat يقول...

ايوااااا
اجينا للحكي الصح...
اول شي يا عزيزتي، مين حكى انو احنا امة العلم و الأخلاق و الحضارة؟
احنا بنعرف كيف نكون ما ذكر اعلاه، بس بيننا و بين العلم و الاخلاق و الحضارة صحراء كالاهاري...
واضح انو مامتك انسانة فهمانة و من النوعية اللي ما في منها كتير... النوعية اللي بتميز الصح من الغلط و بتلزم حالها بالصح، و مش عم تفهم ليش اللي حواليها ما بيقدروا يكونوا متلها... امك من النوع اللي بيعرف كيف يكون من امة العلم و الاخلاق و الحضارة و بتمشي بهاد الطريق و بيتطبق يللي بتعرفو... لكن للأسف مو الكل هيك... انا و عم بحضر حلقات "خواطر" عاليوتيوب انصعقت من بعض الردود!! تخيلي يا عزيزتي انو في ناس للآن عم يحاولوا يثبتوا انو احنا احسن من اليابان!! و الله انا قرأت التعليقات و طلع ضغطي و سكرت الصفحة و بطلت احضر عاليوتيوب.. قلت لحالي بحضر عالتلفزيون ارحملي...
فالجواب على سؤال والدتك يا عزيزتي صعب :-)
و سلميلي عليها كتير و احكيلها الله يصبرنا و يعطينا برودة القلب اللي عند باقي العالم...
و احكيلها يسلمو ايديكي عشان جبتيلنا دريمي فيلاجر :-)

و بالمناسبة ازا الحرقة عم تغلبك جوز اختي جابلي اشي اسمو Tums
هو دوا اقراص بس على طعم الفواكه... كتير ممتاز و بيطفي الحرقة فوري... جابو من امريكا، بس اتوقع انو في منو هون بالبلد...

Dreamy Villager يقول...

بتعجبيني لما تتحمسي وتكتبي تعليق طويل :) والله كثير بنبسط.

أمي نايمة حاليا مع اني كنت حابة أحكيلها اللي كتبتيه وأكتبلك ردها...بس أنا بدي أرد عن نفسي هسه.
فعلا.. أمي بتحب المثالية تقريبا وبتتوقع يكون الكل هيك... بس للأسف :/
أنا ما قرأت التعليقات على اليوتيوب مع اني شفت أكم حلقة هناك...هسه شفتهم والصراحة اشي بقهر كثير :(
رح أسلملك عليها..مع انها ما عرفت بالزبط كيف أنا سألتكم وانتو جاوبتوا..يعني ما عرفت اني بدوّن ؛)
وبالنسبة للدواء رح أسأل عنه ان شاء الله...وتسلمي يا رب.

اشي ثاني..أنا فتحت كل المدونات اللي بدي أعرف أخبارها وأعلق عندها وكان من بينهم مدونتك...ظليت فاتحيتها يمكن 3 ساعات بدون تعليق...انلخمت قد ما كان فيه مدونات بدي أقرأهم... بعدين اكتشفت انك علقت عندي وأنا بعدني زي ما أنا...فرحت علقت عندك وعلقت هون...وهسه بدي أرجع أعلق عند الباقي ؛)

قط البكتريا يقول...

طبعا كنت موجود
مش بكتريا وبكل مكان بنكون :D

Dreamy Villager يقول...

قط البكتيريا...
ما خطرتلي هاي :) ...الواحد بده يصير ينتبه على كل اشي بقوله من وراكم :D

حسام كراسنه يقول...

صرت أحس أنه برنامج خواطر، لدرجة الفرق الكبير بين اليابان و"الكوكب الآخر" بصدمة أكثر ما هي حب للتغيير، مقارنة "بالعمار، والوقت، والمدارس والنظافة من حيث رمي النفايات والحمامات العامة وووو" مع وضعنا الحالي، أنا متأكد بانه مستحيل أن نصبح كـ 1% من اليابان، إلا "اذا وقعت علينا قنبلة واحتلتنا اليابان" :)
"أمة الأخلاق والعلم والحضارة" هناك فرق بين أن نكون أمة الأخلاق والعلم والحضارة، وأمة تريد الأخلاق والعلم والحضارة، ثقافة اليابان مبنية على حب الوطن أولاً حتى في ثقافة الانتحار تكون في سبيل الوطن. ما أضاعه اليابانيون بحاجة لملايين السنين لايجاده :)

Dreamy Villager يقول...

حسام كراسنه...
هو يمكن بيصدم ... يعني البرنامج مدته تقريبا ربع ساعة وبركز على أشياء محددة وبكررها علشان يكون الها تاثير بعد الأكم دقيقة هذول...فبتطلع الجرعة مركزة و على العقل...بس أنا هذاىاللي بعجبني بالبرنامج :)
بعدين وحد الله ... إن شاء الله بنصير أكثر من 1% بدون ما يفجرونا اليابانيين ونموت وييجوا يعمروا بلادنا :)
أنا بعرف اننا بنتغنى بأمجاد الماضي العريق دايما ...بس بحس لازم نذكره بين فترة والثانية حتى يكون عندنا أمل ونعرف انه الغلظ منا واحنا اللي مقصرين وانهم زمان أبدعوا لما التزموا بالقيم العالية وقرنوا القول بالفعل.. مش بس تنظير بالحكي.

Ahmad Hamdan يقول...

انا ممكن رأي يكون متأخر بتعرفي شو الفرق بينا وبينهم انهم بتعلمو من أخطائهم وما بيقضوا وقتهم بلومو اي حدا تاني على اي فشل يتعرضو الو والتزموا بالعادات والأخلاق بكل شئ, يعني مثلا هيروشيما تعرضت لأسوء جريمة ممكن يتعرضلها بلد ومع هذا ما ضل اليابنيين يعيطو ويحكوا راحت هيرشيما بالعكس بنوها افضل مما كانت قبل, تعالي عنا طلعنا من الاستعمار قلبنا مجتمعاتنا لعنصرية وقلبناها لمجتمعات مفهوم الرقي عندها يرتبط بالتعري وبالجنس والسينما وشرب الخمر وشتم الدين وتركه, احنا ما زالت الناس تتحدث بنظرية المؤامرة لاي شي سئ يحدث حوليها وما بتهتم تصححوا او تنهض بنفسها, احنا شعوبنا بس بتلوم حكومتها على كل شي وتنسي تلوم حالها

eNAS يقول...

سلام دريمي :)
كيفك, انا مش جاية أحكي عن الموضوع , المدونين ما شاء الله كفو و وفو :)
جاية بس أطمن عليكي, احكيلك حمدا لله على السلامة, وما على قلبك شر :)
سلميلنا على الوالدة واحكيلها , ما بتعرفي يمكن يجي يوم ويصيرو اليابانين .. هااا شفتو كيف الاردن .. يا ربت نصير متلهم
خلص ما تخافي انا طبيعية بس يمكن كنت نايمة و بحلم وهلا صحيت :)

mais يقول...

لانه عنّا عوملة اكثر من اي شعب اخر ..
و معنى كلمة عولمة هو فصل الدين عن الدنيا ..يعني الاسلام هو الصلاة والصوم عند الاغلب فقط و في الغاء للاخلاق و "الاداب" ..
حبيت الموضوع شكرا :)

Jarat يقول...

مرحبا دريمي :)
سلامتك انشالله اتكون احسن وما عليكي شر
الله ايخليلك والدتك والله يعني انا ما بعرف باليابان غير انهم عمرهم ما دخلو بنقاش معارض حتى لو كان غلط وعارفين انو غلط مش ممكن يحكو هادا غلط بس والله يا دريمي فلسطين الها سنين وهي بتحارب عشان ارضها باعو اولادهم وبيوتهم عايشين غريبين في بلادهم وبرا بلادهم عشان يحافظو على القضيه الي ما راح يتنازلو عنها لو ايش ما يعملو عشه عمري كلو كلاجئه انغرسه فيها حضاره وتاريخ وحبها لفلسطين قبل ما اشوفها بس بتعرفي يا دريمي صحيح ساعات بقول ايش فلسطين وين فلسطين ايش عملتلي ولا اشي غير انها اعطتني اسم لاجئه من غير هويه ضيعتني في الدنيا بس ما راح اخضع للعدو ولا راح ادفن راسي بالتراب زي النعام و لسه اصلي وعاداتي وتقاليدي وحبي الها بالعقل والقلب لانو انغرس فيا من البدايه امابالنسبه للي على الكراسي بلاش ندخل بالسياسات لحسن نخرب الدنيا ويقولو عني ارهابيه انا من غير واسطه لاجئه يعني خلينا ساكتين ههههه
مدونه جميله بتمنى تتقبلي مروري المتكرر وكمان مره سلامتك الف سلامه يا رب :)

Dreamy Villager يقول...

Ahmad Hamdan...
رأيك مش متأخر...بالعكس أنا اللي آسفة على الردود المتأخرة.
صحيح زي ما حكيت...احنا ما بنتعلم من الخطأ...وممكن نعيده ونكرره ومرات ناس بدافعوا عنه...بحبوش يعترفوا انهم غلطانين... واذا صار واعترفوا بخلوا الحق على غيرهم..مع انه هذا اشي أسوأ بحقهم..يعني شافوا الغلط وما قدروا يمنعوا حدوثه أو يوقفوه.


eNAS...
الله يسلمك ويخليك دايما يا حلوة :)
خلص بسلملك على أمي...ولا أكيد إن شاء الله بييجي هاليوم..بس فكرك بنكون عايشين وقتها ؛)


mais...
طيب احنا ليش تأثرنا هيك بالعولمة...هو أي حدا بحكيلنا أي اشي بنرد...مالنا بنقاومش شوي :(
العفو :)


Jarat ...
والله أهلا وسهلا..شرفتي :)
الله يسلمك يا رب...والله يخلي للكل أهاليهم ...آمين.
أول مرة بعرف انه اليابانيين بحبوش الجدال...مش زينا...هو الاشي الوحيد اللي بنعرفه.
والله أهلنا بفلسطين بيرفعوا الراس...الواحد قدامهم بحس قديش هو مقصر وعايش عشان أشياء تافهة... واللي برا فلسطين أكيد حبهم الها بدمهم ومش رح ينسوها ولا رح يتخلوا عن قضيتهم...بس فلسطين مش هي اللي سمت حدا لاجئ ولا ضيعت حدا...هاي كلها من أعمال الناس...وفلسطين ما الها علاقة فيه.
وآه بلاش منها السياسة ؛)
وأهلا وسهلا فيك على طول :)

مياسي يقول...

والله حياتنا حياة اللهم نفسي
والواحد لما يعيش لنفسه بس هيك نتيجه بتكون تطور طبيعي

كيف رمضان ؟ ان شالله الحرقه خلصت يا بنتي كلي شوي مش ضروري تضلي "سمباتيك" :)

Rana Al Sha'bani يقول...

أهلا وسهلا بالتعبانة من الصيام. مأجورة إن شاء الله.
تعليق قط البكتيريا و hamede على الموضوع رائع. وهما يلخصان أهم الأسباب التي تصنع هذا الفرق الشاسع بيننا وبين غيرنا من الأمم.
المهم إنو أمريكا ساعدت اليابان حتى تقوم، واليابانيين ساعدوا أنفسهم. ولكن نحن نظلم انفسنا بالبداية(بالفساد، والكسل، وغيره) ولن أضع اللوم على أمريكا أو غيرها.
وسلمي عخالتو وقوليلها هادول اليابان كوكب آخر.

Dreamy Villager يقول...

مياسي ...
طيب لما واحد بعيش عشان نفسه بحسش فيه اشي ناقص...اشي للمجتمع؟!
الحمدلله الوضع أحسن...ولا تخافي علي باكل كويس :)


Rana Al Sha'bani...
حاسة حالي زي الأولاد الصغار اللي بتعلموا الصيام :) الحمدلله انه كله بأجر.
آخ من أمريكا...لقت عندنا بيئة ممتازة لنمو أي اشي سيء :/
وإن شاء الله بسلملك عليها.

Genki Dama يقول...

Dreamy villager

Such a question can not be answered easily

history as well as other interrelated factors play a role in what happened! Some of these factors very complicated in their relation to the question

The answer of such a question is a book

But am glad that ur mom is getting the idea, the program is intended to show us some lessons about how to become civilized but people are not getting the idea, they just keep talking about how developed is Japan, and how much we sux, but the point of the program is to notice that Japanese starting point was worst than what we are in now and that we can DO THE LEAP 

jumana يقول...

mr7aba :)
kefeek??
kefkouun chabab w sabaya :P

brnamj khawater kteeer 7lo w mofeed ana 7drta hadeek el 7al2ah :)

inchallah el 3arab ystfedo :)

walla ma b3rf jwab el so2al .. sam7enni :) b3rf ino el 3arab '7aybeen b kl she!! Lol

jafra يقول...

اليوم اتفرجت على برنامج خواطر بالصدفة و تدكرت اللي انت كتبتيه
طبعا كان عن الفرق بينا و بينهم
و كان كالعادة كبير
ما رح احكي عن الحلقة لانو لازم الواحد يتابعها
بس بدي احكيلك انو حالة الغيبوبة اللي نوعا ما انت برمضان فيها
احنا كمجتمعات ادمناها
بصراحة البرنامج جابلي اكتئاب

Dreamy Villager يقول...

آسفة جدا على التأخير بالرد.

Genki Dama...
والله يا أخي شايفيتلك التاريخ عجب علينا...بالإضافة لأشياء ثانية زي ما حكيت... بس أنا شايفة فيه أشياء احنا اللي جبناها لحالنا وصارت اشي بطبيعتنا.
وصحيح فيه ناس مش عاجبيتهم المقارنة..أنا بالنسبة اللي حبيتها وحاسيتها فرجتني جوانب ما كنت أعرفها وخلتني أطلع بأفكار براسي.

** فيه مشكلة ب"بلوجك" كل ما آجي أفتحه بييجيني تحذير...شو السبب؟


jumana...
الحمدلله الكل بخير :)
إن شاء الله بنستفيد...بس حرام عليك..احنا مش خايبين بكل اشي...احنا شاطرين بأشياء كثير مش مفيدة ؛)


jafra...
أهلا وسهلا نورتينا :)
كويس اني أعرف انه فيه حدا زيي .
كأني بلاحظ البرنامج أثر بنسبة من المشاهدين بطريقة عكسية...يعني شغلة المقارنات هاي خلتهم يتثبطوا أو الفكرة نفسها مش عاجبيتهم.

اقصوصه يقول...

كل عام وانتم بخير

تمنياتي بقضاء عيد سعيد

Jarat يقول...

مرحبا دريمي كيفك كل عام وانتي بخير انشالله رمضان ينعاد عليكي وعلى الاهل بالصحه والعافيه :)

Dreamy Villager يقول...

آسفة على التأخير بالرد بس كان فيه مشكلة بالكومبيوتر.

اقصوصه ...
وأنت بألف ألف خير :) وغن شاء الله تكوني انبسطتِ بالعيد.


Jarat ...
وأنت بألف ألأف خير وينعاد علينا وعليكم والله يتقبل منا :)

~PakKaramu~ يقول...

Pak Karamu visiting your blog

Ahmad M. Al-Mahrouq يقول...

You have been tagged

Naryat يقول...

ديوووووود
الك مغمى عليك من اول رمضان!!
وينك يا زلمة؟ و مس يو :-)
كل عام و انتي بخير يا بطة :-*

Naryat يقول...

و هي اجاك تاغ يا ابو الشباب :-)

XTR يقول...

Dreamy Villager, where have you been? The entire blogosphere misses you!
Anyway, good luck with everything and we hope to see you soon.

Dreamy Villager يقول...

~PakKaramu~ ...
Wlcome in my blog, and Thank you for passing by :)


Ahmad M. Al-Mahrouq ...
والله إنك على راسي... أول مرة بيجيني تاغ ... شكرا كثير :)


Naryat يقول...
تعليقك لخمني ... فكرتك غلطانة بالبلوغ :)
هاي قصتي طويلة... إن شاء الله بكتب عنها هاليومين...والله اني مشتاقة كثييير الكو كلكو.
وكل عام وانتي بخير ؛)

وبالنسبة للتاغ صار "مزدوج"...ان شاء الله بكتبلكو اياه اليوم.. شكرا يا بطة ؛)


XTR ...
شكرا على سؤالك ... والله اني مشتاقة الكو نفر نفر :)
الله يسمع منك ويوفق الجميع... آمين.

Jarat يقول...

مرحبا دريمي

بتمنى انك بخير وانشالله ال2010 اتكون سنه خير عليكي وعلى الاهل والله يحققلك جميع امالك انشالله

وينك طمنينى عنك طولتي الغيبه على فكره اكتير هيك :(

بتمنى نسمع الاخبار الحلوه عنك عن قريب :)

Nidal يقول...

hi :)so2al 2emmek (2la 2y5alelek 2yaha) kter 7elo ... 3ala ma 23ta8ed 2nno 2lyabaneyyen rakkazo 3al 2shya2 2le bet5ale 2lbalad men 2l8owa 2lkbeere ..2lle howwe 2lsena3a ...ba3d 2l7arb 2l3alameye 2ltanye sar fe thawra sena3eyye bel3alam ..2oroba o 2mreka mostly kano barzen feha ...2lseen w 2lyaban 2le 3emlo 2no 2a5ado 2l mabade2 2lsena3eyye o 2l2edara 2lsena3eyye men 3ndhom o tabba8o 3aleaha ..mos6ala7 2l TQM (total quality managment) awwal men bllash 2y6ab8o homme 2lyabaneyyen 3an 6aree8 3alemean 2mrekeyyeen ..kano yoktobe heak 2shya2 bas 2l amrekan ma 236ohom 23tebar..2lyabaneyen jabohom 3ndhom ..o 5alloohom 2ydero 2l quality belasne3..oba3dean lama shafohom heak 2l2mrekan saro ya5do men 2lyabaneyyeen hay 2l mabade2 ta3et 2lquality o 2y6ab2oha ( ma3 2nha kanat 3ndhom men 2l2wwal ) ..o la halla2 bne3ref 2no kef 2ljawde 2lyabaneye beltasne3 heyye 27san owasafat bel3alam ... bel2dafe 2nhom zado 3ala hay 2l2shya2 kter 2n`6emo zay 2l (6 sigma) o 3`earha fa heak kano men 2lrowwad bel2she 2le kan ra2ed b wa2-tha fa 3erfo kef yerja3o 3a 2jreahom men don mosa3adet o ta2theerat america :)
hopefully i helped in answering ur mom`s question

Whisper يقول...

اين انت يا دريمي
اشتقنالك :(

Dreamy Villager يقول...

Jarat...
أنا الحمدلله تمام..وآسفة على التأخير :/
إن شاء الله السنة هاي بتكون خير للجميع.. آمين.
شكرا على السؤال.


Nidal...
أهلا وسهلا فيك هون دايما وشرفت ( مع أنها كتير متأخرة) D:

تعليقك خلاني أفكر أنه احنا ما عندنا نفس طريقة تفكيرهم ..قصدي أنه هم طلعوا من حرب بس ما اكتفوا أنهم يرجعوا اللي خرب ببلدهم ...لأ وزادوا عليه بأنهم اقتحموا الصناعة زي ما حكيت.
أول مرة بعرف عن العالمين الأمريكيين اللي استفادوا منهم اليابانيين...معلومة والله حلوة :)
شكرا كثير عالرد.


Whisper ...
أنا هنا ;)
وأنا والله اشتقتلكم أكثر ...وان شاء الله راجعة قريبا.
شكرا على الاطمئنان :)

Jarat يقول...

دريمي وينك غاطسه يالله بيني في tagged الك تكتبي 50 شغله عن حالك :)

اشتقنالك انشالله امورك تمام يالله عاد طمنينى عنك :)

سارة الحميدان يقول...

السلام عليكم ورحمه الله وبركاته ..

سؤال والدتك في محلةْ تماماً

رغمَ أن التدوينة قديمةْ !
لكنني أحببتُ أن أشاركَ بـ رأيي !

فـ هذا المهمًّ في عالمِ التدوينْ !
لا يتوقف الكلام عند تاريخ نشر التدوينة ..
وإنما يستمرُّ حتى تستمرَّ المدونة ~

عموماً لن أطيل ..

[ هذه مشكلة وتحتاجْ لـ حلْ !
الحلُّ بأيدينا ونحنُ نراه وننتظر من يطبّقه .. والجميعُ ينتظر .. ولكنْ !
لا أحدَ لديه الشجاعةُ بالبدء !

فـ أمةُ اقرأ على سبيلِ المثالِ أصبحتْ لا تقرأ !
وأمةُ الأخلاقْ والمكارم تخلّت عن ما يربطها بـ أخلاقها بالدينْ .. وأكتفت بالسعادة الدنيوية !

طيب ما الحل ؟

(( نبدأ ))

أنا ، أنتي ، أمك ، أخوانك ، أخواتك ، أسرتي ، بيتنا ، كل عائلتي .. وثم أصدقائنا وهكذا !

(( طيب بماذا؟ ))

بـ الاصرار
بـ القوة والعزيمة ~

(( على ماذا؟ ))

على العودة لـ أساسنا !
لـ ثقافتنا التي يجب أن نبنيها نحنُ دونَ أن ننتظرَ من يبنيها لنا !

على أخلاقنا التي تعلمناها في "السيرة النبوية" في المدارس حينَ كنّا صغار فـ أختبرنا بها ونسيناها !
نثبتُ عليها .. بـ قوة وَ سعادة و استمتاع !

على رفعِ أقلامنا .. كلماتنا .. أصواتنا عالياً !
بـ علمْ !
بـ رأي !
بـ مشكلة وَ حلْ ! ؛ ولا نكتفي بالتذمرِ فقط .. وإنما نفكّر ونحلل ونوجدْ حلْ !

...

دريمي ،
عذراً للإطالة لكنّي فعلاً أستشيطُ حينَ أتكلمُ عن هذا الموضوعِ طويلاً وَ طويلاً !
فـ هناكَ الكثير من المشاكل التي ليست لها حل ويجب أن نجعل لها حل !

.

فـ مثلاً حينما قالَ "حميدي في ثاني تعليق على التدوينة" عن ظاهرةِ التخريبْ !
مثلاً في حالةْ أن ضبطَ أحدُ وهوَ يخرّب فمصيرهُ الغرامةْ !
الغرامةُ ليستْ إلا حلاً يبعثُ للتذمرِ والكره زيادةً !
فـ مثلاً هناكَ حلٌّ آخر !
[ بطاقة "كلنا للوطن" يوقع عليها ويتعهد بذلك .. ويكلّف بتصليحِ ما خرّبه ، وكلُّ ذلكْ يمكنْ أن يحصلْ خلالَ أعتذار وابتسامة !!]

.
عموماً هذا شيء بسيط مما أفكر به !
فـ عندما أسمع بقضية أو شيءُ يستحق التفكير بهذه الطريقةْ !
تزدحم الأفكار والكلمات حتّى لا أستطيع التعبيرْ !

فـ سأكتفي بهذا القدرْ !
أتمنى أن تري التعليق =)


وعلى فكرة أنا المدونةْ
سارة من المملكة العربية السعودية :)


عذراً على الإطالةْ عزيزتي ~
كلّ الود :)

Dreamy Villager يقول...

Jarat..
سلام ..و أنا والله مشتاقة كثير ..أنا الحمدلله بخير بس كان في أشياء شغلتني و إن شاء الله ما بتتكرر

التاج إن شاء الله بكتبه قريباً بس اكتب التاج الأولاني :)


سارة الحميدان..
أهلاً و سهلاً و شرفتي ..و طولي زي ما بدك ..أساساً هذا المطلوب

حسيتك تحمست فعلاً بالتعليق ..و حلوه الطريقة تبعتك لما تركزي على كلمه بين قوسين ..

و زي ما حكت احنا لازم نبدأ بأنفسنا علشان الأمور تصير أحسن.

saja muzaini يقول...

لمن قرأت عن الأكل اللي بنكب قررت انو لازم أحط الفيديو اللي عملتو هون:

http://www.youtube.com/watch?v=4I2k53yJHKw

تفرجوا عليه وخلنا نحول نوصل للناس انو هاد الموضوع خطير كثير ولازم نتصرف فيه..

Jarat يقول...

الحمدالله انك بخير !:)

احنا بنستنى لا اطولي علينا ! :)

Dreamy Villager يقول...

...saja muzaini
أهلا وسهلا فيك..شرفت :)

Jarat ...
تسلمي يا عسل :)