الاثنين، 21 آذار، 2011

21 مارس

بتاريخ 21 مارس فيه مناسبتين...
- يوم الأم (بديش أحكي عيد..لأنه مش عيد واحنا ما منعطلش فيه..العيد عندي معناته عطلة)
- وذكرى معركة الكرامة

المناسبة الأولى:
زهقت قديش الناس سألوني شو رح تجيبي لأمك؟! بحس بدهم أفكار وبدهم يعرفوا قديش ناوية أصرف على هدية !! احنا كنا ناويين نجيب مايكروويف لأنه اللي عنا خربان من زمان ..فقررنا (قررت أنا لحالي) انه نجيب واحد ونخليه هدية لأمنا مع انه هو للبيت أصلا..الكل قرر يشارك بالهدية ..ومع ذلك ما اشتريناش اشي :) صارت لآخر الأسبوع لأنه ولا حدا فاضي.
بعدين أنا جد مش عاجبني انه الناس بعايدوا على الأمهات فيه.. مش بس من منطلق ديني..من منطلق انه على ايش بتعايدوا ..على انها أم..واليوم تحديدا..يعني امبارح بالليل ليش ما حدا حكى لأم "كل عام وأنت بخير"..بتزبطش ولا معناها غير بكون؟! حسيت الوضع مبالغ فيه.
غير هيك..فيه وحدة بعرفها أمها توفت مش من زمان...على الفيس بوك كثير بتعبر عن مدى اشتياقها لأمها..وامبارح بالذات حزنتني كثير..حسيتها متضايقة مع هاليوم وهالستاتوس اللي الكل بحطها للأم :(

أنا بحياتي ما عملت عمل تطوعي..نفسي أعمل بس ما عنديش دافع قوي يحركني..وأنا مروحة من الدوام بمر من الSOS وبكون أفكر لو مرة نروح مجموعة ونزورهم نقدملهم اشي أو بس نتطمن عليهم..فالأسبوع الماضي كنت أفكر فيهم انهم بلا أم وأب وفيه هاي المناسبة اللي جاية..وطبعا ما عملتش اشي..ورجعت شفت الأخبار وجايبين عنهم تقرير عشان نفس المناسبة..فخطر ببالي:
انه لازم هذا اليوم يخصصوه للعمل التطوعي..لازم الكل يعمل اشي لغيره..لأطفال أيتام..لكبار سن أمهات وأبهات كمان..للناس المحتاجين..ولازم يجبرونا على العمل التطوعي..أنا متأكدة انه فيه ناس زيي بستنوا المبادرة من حد ثاني..فلازم شوية اجبار..مش كثير علشان ببطل اسمه تطوع.
بعدين قلت انه بنفعش عمل تطوعي يوم بالسنة..لازم أيام كثير..يكون اشي على كل واحد انه يعمل حد أدنى على الأقل ببرنامج محدد
يعني زي ما الناس بحبوا عمل الخير برمضان وسلات رمضان وهيك (أنا بحياتي ما عملت مساعدة حسيتها كبيرة برمضان) لازم يكون فيه اشي يشجعهم بغير رمضان


المناسبة الثانية
الصراحة انه بعرفش عنها بالتاريخ اشي..بس جابوا اشي بالأخبار عنها.. وفي حرب استنزاف وحزيران وما فهمتش (انا مقصرة بالتاريخ المعاصر كتير) ..بس اللي ضحكني انه عاملين احتفالية بهاي المناسبة بمشاركة:
- الكشافة (بحياتي ما عرفت الفائدة الحقيقية من الكشافة عنا..شاركت مرة بالكشافة..وكل اللي كسبته انه راحت علي الحصص عشان يدربونا ويشحططونا بمناسبات سخيفة)
-بعدين وزير التربية حكى كلمة ما فهمتش منها اشي..ولا عرفت شو بده
-وحدة كأنها من جمعية نسائية صارت تبارك للأمهات عامة وأمهات الشهداء بمناسبة عيد الأم
-واحد من جمعية عشان "مكافحة المخدرات" .. !!؟؟!!؟؟
فمن الآخر بدي أسأل : الحق عمين اني ما بعرف عن معركة الكرامة اشي ..علي ولا على الاعلام ؟!

السبت، 12 آذار، 2011

يوم التدوين عن الأردن #B4JO

أول‏ ‏مرة‏ ‏بشارك‏ ‏بيوم‏ ‏التدوين‏ ‏عن‏ ‏الأردن॥ ‏;كنت بحاول أدورعلى‏ ‏موضوع‏ ‏جذاب‏ ‏أو‏ ‏فكرة‏ ‏مبتكرة‏ ‏كأول‏ ‏مشاركة‏ ‏॥ وبعد ‏ما‏ ‏يئست‏ ‏قررت‏ ‏اني‏ ‏ما‏ ‏أكتب‏ ‏وأكتفي‏ ‏بالقراءة‏ ‏والتعليق॥ ‏وفجأة‏ ‏استوعبت‏ ‏الفكرة‏ .. ‏أكتب‏ ‏اشي‏ ‏مفيد..
بحب‏ ‏الأردن‏ ‏وبحب‏ ‏طبيعتها‏ ،وبحب الناس وطبيعتهم ،بس فيه أشياء كثير مزعجة بالبلد:
- قلة التنظيم :هاي الشغلة موجودة بكل اشي، بالمواعيد ،بالزيارات، بالدور، بالمواصلات،تقريبا كل الأشياء الحكومية فيهاش تنظيم، وحتى لما يكون فيه تنظيم الكتروني (ببرنامج ونظام على الكومبيوتر) بقدروا يلاقوا طريقة يتحايلوا عليه

- الممتلكات العامة ما الها أي احترام بالبلد، كل اشي مسموح انه يتخربش عليه أو نمزع منه اشي أو نخربه بأي طريقة:الباص ،الكتاب، المباني

- الاخلاص بالعمل، قليل ما بشوف حدا بشتغل من قلب ورب، وانا منهم دايما بقول لحالي الصبح اني ما بدي أكون زي الناس اللي ما بحبهم،بس بعرفش ليش بصير اقول لحالي "هو انا الهبلة الوحيدة الي رح اشتغل هون؟!" ،وبصير زيهم، بعدين كثيرناس بيوخذوا أغراض من الشغل وبسمحوا لحالهم يتملكوها او يستفيدوا منها

- فيه أشياء ثانية ، ومنها انه ما في حقوق متساوية للجميع،فيش عدل، ومش الكل بيحصل على الخدمات اللي لازم يحصل عليها كبي آدم،فيه ناس كثير بيفتقدوا الأساسيات بالحياة ولما أفكر مرات بظروفهم بحس انه صعب كثير تتغير، ولازم نغير المجتمع كله علشانهم بس اكيد الحل أبسط من هيك

بتمنى أشوف الأردن أحسن وإن شاء الله انها بتكون هيك :)

الخميس، 24 شباط، 2011

"التاغ" اللي كان لازم أكتبه من زمان

ملاحظة: البوست كان مكتوب جزء كبير منه من زمان، عدلت عليه شوي، مع اني كنت بدي احذف الجزء الخاص بالأشخاص لأنه قديم وصار بلا طعمة وكنت مستحية ،بس كنت محدديتهم من أول ومش مصيبة لو خليته زي ما هو
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ


مرحبا ، بعرف انه هذا البوست صار قديم ووعدتكم أكتبه زمان بس ظروفي كانت ضد إرادتي. . . وبعرف اني بستحيش عحالي، بس اجاني تاغ لأول مرة وبدي أستمتع فيه :-)

أحمد المحروق الله يسعده عملي تاغ. والحلوة ناريات كمان تيغتني عشان يصير الموضوع رسمي ب "تاغ مزدوج".
موضوع التاغ اني أكتب ٣ أماني الي وكمان أعمل تاغ لستة أشخاص.

الأماني هي:
١. أنه الله سبحانه وتعالى ييسر أموري وأمور الجميع بالدنيا ويكون الكل مبسوط بحياته وراضي عنها.
٢. أنه ربنا سبحانه وتعالى يعفو عنا ويغفرلنا ويرضى عنا وندخل الجنة بلا حساب...آمين.
٣. أنه يكون عندي عدد لا نهائي من الأمنيات ؛)

والأشخاص اللي بعمللهم تاغ هم : ( يمكن يكون واصلهم تاغ من أول وأنا مش عارفة بس ما قدرت أرجع أتأكد من البوستات القدام لأنه كثير أشياء راحت علي)
١. Jarat 3asal
٢.Farah
٣.Ahmad Hamdan
٤.Mais
٥.Yazid
6. أي حدا بده يعمل تاغ لحاله.

سلام

سلام يا حلوين :-)

أنا بخير وكلشي تمام بس حبيت أشوف قديش بتفتقدوني ؛-)

والله كان في أشياء زنخة خلتني مشغوله ، انشغلت بالأول بدوام جديد وكنت مش عارفة أتأقلم معه ( وبعدني ) وبعدين بطلت ألحق أقرأ تدويناتكم، ولما كنت أقرأها تكون متأخرة وما أقدر أعلق عليها وشوي شوي بعدت عن البلوغ، وصرت أستحي أمر عليكو بس عشان أحكي "مرحبا" بدون ما أقدر اقرأ شو أنتو كاتبين

الدوام هو أكثر اشي شغلني وبصراحة مش حابة أكتب عنه حاليا لأني كثير بكرهه، وأكثر من مرة كنت جاية على المدونة بس علشان أقعد أشكي وأحكي على الناس اللي فيه وبعدين بهدي حالي وبروح الموضوع :-/

وبعدين مش جاي عبالي أصير أحكي أشياء شريرة وأنا معصبة، ولما أرجع أقرأها أستهبل حالي

كمان، ما كان عندي اشي أقوله، كلها أشياء كئيبة أو مش مسلية ، وكنت أمرض كثير،يمكن من طبيعة الشغل ويمكن حالة نفسية بس كانت مناعتي أغلب الأوقات بالمرة

من فترة حسيت انه فيه أشياء بتتحسن بالدوام وشوي صرت أقدر أفكر بأشياء ثانية وأحاول تكون ايجابية وطبعا اني أرجع أكتب هون من اولها

الحمدلله على كل اشي، هو فيه أشياء كثير بدي أحكيها بس انا قاعدة بالدوام وقدرت أكون لحالي شوي وحبيت أكتب عشان أشجع حالي ،بس بعدين بكتب بترتيب وبدون ما يكون فيه ناس بمشوا بالممر يتفرجوا شو قاعدة بعمل

سلام :)

الجمعة، 4 أيلول، 2009

أمي بتسأل

أمي طرحت سؤال بعد ما كنا نتفرج على برنامج "خواطر" وحكتلي: فيش موقع على الانترنت بيقدر الواحد يسأل فيه اللي بده اياه؟ فأنا قررت أحط سؤالها هون .. بس قبل ما أسأل بدي أشرحلكم شو الجو اللي احنا كنا فيه عشان تعيشو معانا.

كنا بنتفرج على حلقة خواطر على قناة الرسالة عن الأكل بالمدارس .. وأمي كل شوي تتحسر وتقارن بينّا وبينهم وتقوللي انه هاي الأشياء صعب نقدر نطبقها عندنا.. واحنا منفرج غيرت شوي على قناة الأردن وشفنا الأخبار .. كانوا عاملين تقرير عن المدارس :/ وانهم مغيرين بالمناهج و انه "بطل فيها زخم زي زمان ولا تكرار وهالحكي الفاضي" ..أساسا منظر الصف الأردني بعد ما كنا نتفرج على الصف الياباني كان غير مشجع. رجعنا على برنامج خواطر ..وكانوا بناقشوا انه اليابانيين ما بخلوا أكل زايد بصحونهم ..وقارنوهم بالعرب والمسلمين.. أمي وهي تتفرج على الأكل اللي بكبوه بالزبالة عصبت عن جد ..وقلتلي انه هيك كانت المناظر لما راحوا على الحج .. ناس بتحط بصحونها أشياء كثير وما بيوكلوا منه اشي .. وهاي هيك هم بالحج والمفروض انهم يتبعوا شرائع الدين.


بعدين طرحت السؤال اللي بدها تعرف جوابه :
هسه أمريكا لما حاربت اليابان وحاولت تقمعها .. كيف ما نجحت وقدروا اليابانيين يحافظوا على تقاليدهم ويطوروا أنفسهم ويعملوا نهضة؟ بينما احنا أي عمل بوجهوه ضدنا بنسكت وبنرضخ .. وبينجحوا بأنهم يمحوا هويتنا ويخلونا نعرقل بعض ونصير بالحالة اللي احنا فيها؟ ليش اليابان صمدت واحنا لأ؟ مع انه احنا أمة الأخلاق والعلم والحضارة.



امبارح حضرنا محاضرة
للشيخ عمر عبدالكافي .. ومع انه القاعة كانت مليانة على الآخر على أساس انه الناس مهتمة تحضر.. فيه كان ناس عاملين دوشة والأولاد الصغار بصيحوا وناس بتحكي بالتلفونات أثناء المحاضرة.. وبس خلصت المحاضرة الكل ما صدق ويروح. أمي طبعا اتذكرت أحداث المحاضرة تبعت امبارح وصارت تقوللي انه حتى بالأشياء الدينية ما عندنا فيها اهتمام أو تنظيم .


*******************************************************

اشي ثاني.
أنا الي من أول رمضان تقريبا بحالة غيبوبة .. يعني أول يومين كنت مش متعودة وكنت أتعب بسرعة .. بعدين لما تعودت على قلة الأكل والشرب صرت أي لقمة آكلها أو حتى شوية مي أشربها تعمللي حرقة ... وبطلت أعرف آكل بزيادة وأظلني طول اليوم منهارة وما أعمل اشي..عشان هيك ما قدرت أقرأ مواضيع كثير كتبتوها .. مع اني كنت أحاول أتابع الأخبار بس ما في فايدة.
إن شاء الله بحاول أقرأ وأعلق على المواضيع اللي بلحقها .. وإن شاء الله ببطل الكومبيوتر يعلق كل شوي ... فاعذروني.
انتو بس ردوا على سؤال أمي ... وبعدين بنتفاهم :-)

الجمعة، 21 آب، 2009

بدأنا رمضان وكل عام والكل بخير..والله يتقبل منا ومنكم :)

طبعا كالعادة أنا ناوية أقيم الليل وأقرأ قرآن، وبحلم أني أختم القرآن أكثر من مرة ... مع اني عارفة اني رح أتحمس أول ثلاث أيام وبعدين رح يبدا الحماس والنشاط يقل ... وبيرجع بالعشر الأواخر وتحديدا ليلة 27 اللي الكل بذوب دين فيها :)
طبعا هاي الحالة بتصيب ناس كثيرين،غير الأولاد الصغار اللي بصيروا يصلوا التراويح ويصحوا على السحور بنية الصيام.. بعدين بزهقوا وبينسوا الموضوع :)

بس إن شاء الله، إن شاء الله هاي السنة رح أكون أحسن ... وأنا بكتب قدامكو كلكو هون علشان يكون زي حافز والتزام.

امبارح حاولت "أتحرى هلال رمضان" زي كل سنة ... بس هاي المرة قررت أصور يمكن أشوفه أحسن.. طبعا ما شفتش اشي بس صرت بالغروب.
بس قبل ما أحطلكو الصور ، فيه صورة لإيناس عن شهب البرشاويات ..انسيت أحطها من قبل :/ ... انا ما شفت الشهب و مش عارفة هو هيك كان شكلهم ولا إيدي اهتزت:




وهاي صورة الغروب لويسبر :





وأنا بصور من السطح ضربوا المدفع عند التل .... فهاي الصورة لمحمد ..لو دققت بالصورة بتشوف دخان المدفع :





وهاي الصورة عجبتني فهي الكو كلكو :)



السبت، 15 آب، 2009

ويكيبيديا .. ؟!

بعرف أنه كثير ناس بحبوا ويكيبيديا ويعتمدوا عليها بالمعلومات كثير. بس أنا ما بحبها بصراحة . وقبل ما تكرهوني ( عأساس انكم بعدكم ما كرهتوني ) خلوني أعبر عن رأيي وأقرؤوه للآخر.

أنا كثير مرات لما أكون أدوّر على معلومة بفتح على ويكيبيديا. بس فيها أشياء بتقهرني. كثير من قوانينهم بحس ما إلها معنى وبتتعارض مع المبدأ الأساسي للموسوعة و هي كونها حرة ، وأي حدا بيقدر يحرر فيها وبتتوافق مع رخصة جنو والمصادر الحرة وبعرفش شو. يعني أنا مستوعبة أنه أي مشروع لازمه قوانين تنظمه وبدون هالقوانين بتصير الأمور ضايعة والجهود ما الها فائدة. بس مش بقوانينهم اللي بطبقوها إداريين كثير من قراراتهم شخصية حسب رأيي ، وما بتخدم الهدف وبتتحول لنزاعات و جدال ما اله داعي.

أنا اجتني فترة وكتبت أكم موضوع على ويكيبيديا واتحمست الها. بس بالآخر قرفت من كثير شغلات. اذا اثنين صار بينهم خلاف بعملوا مشكلة وبقترحوا قانون جديد. واذا فيه قانون بعملوا عليه تصويت ومش أي حدا بصير أنه يصوت. وإذا إداري ما عجبه اشي بروح بطبق القانون اللي بده اياه. واذا واحد كتب سؤال بصفحة النقاش بعترضوا لأنه لازم يكتبه عند الأسئلة. واذا واحد ما عجبوا المقال المكتوب بغير فيه على كيفه ويمكن يغيره كله. يعني فتحت على موضوع كنت أنا اللي بدأت صفحته لقيته ما فيه كلمة من اللي أنا كتبتهم وكل اشي فيه متغير ، اذا حتى مغيرين طريقة كتابة التاريخ :/ يعني هاي الشغلة كثير مزعجة لما ييجي واحد يمحي اللي كتبته ويرجع يكتب زي ما بده والواحد حاس انه مجهوده ضاع.
واشي ثاني ما بحبه بويكيبيديا تابع للي كتبته فوق، أنه اي واحد بيمحي اللي مش عاجبه وبيكتب اللي هو مقتنع فيه بعتبر انه رأيه الصح. ومرات بقرروا أنهم يحطوا بالمقال الآراء المختلفة كلها ومرات لأ. أنت وحظك. علشان هيك بحس أنه مواضيعهم ما بيقدر الواحد يعتمد عليها لأنه بتكون ناقصة معلومات ومش شاملة لكل الموضوع. خصوصا بمواضيع السياسة والتاريخ واي اشي بتعلق بالثقافة. بس المعلومات العلمية فيها كثير وضعها أحسن. يعني ويكيبيديا مصدر ممتاز علشان الواحد يبدأ فيه ويوخذ فكرة عن موضوع بشكل عام ، بس ما بيقدر يعتبره مرجع وحيد وصحيح.

يوم الخميس بعرفش شو اللي وصلني على ويكيبيديا وكنت زهقانة على الآخر ، فصرت أتبايخ وشكلي عملت بلبلة. محيت صفحة من اللي مكتوب فيها ( هالة كيرليان ) وقلت لحالي مش مشكلة بيقدروا يرجعوها وعملت حركات ثانية. أنا بعتذر من الجماعة بس عن جد كنت زهقانة وحبيت أعرف كيف رح يتفاعلوا. بصراحة كنت متوقعة أنهم يرشدوني أكثر على اعتبار اني شخص ما بعرف بويكيبيديا ونازلة أكتب عجايب ، بس يعني هم كمان عندهم مليون واحد مش فاهم اشي ومش ناقصهم وحدة زيي (بعرف إني مجنونة) :





اللي بده يتمصخر علي، أو يعترض وما أعرف أرد عليه، أو أي حدا ما بعجبني اللي كتبه رح أشطب تعليقه ؛-)
بمزح :-) ( مزحي بايخ .. كمان مرة بعرف ) ، اكتبوا اللي بدكم اياه وخذوا راحتكم ، بس احتمال كبير ما أعرفش أرد عليكم. هيك أنا حاسة.