الجمعة، 21 آب، 2009

بدأنا رمضان وكل عام والكل بخير..والله يتقبل منا ومنكم :)

طبعا كالعادة أنا ناوية أقيم الليل وأقرأ قرآن، وبحلم أني أختم القرآن أكثر من مرة ... مع اني عارفة اني رح أتحمس أول ثلاث أيام وبعدين رح يبدا الحماس والنشاط يقل ... وبيرجع بالعشر الأواخر وتحديدا ليلة 27 اللي الكل بذوب دين فيها :)
طبعا هاي الحالة بتصيب ناس كثيرين،غير الأولاد الصغار اللي بصيروا يصلوا التراويح ويصحوا على السحور بنية الصيام.. بعدين بزهقوا وبينسوا الموضوع :)

بس إن شاء الله، إن شاء الله هاي السنة رح أكون أحسن ... وأنا بكتب قدامكو كلكو هون علشان يكون زي حافز والتزام.

امبارح حاولت "أتحرى هلال رمضان" زي كل سنة ... بس هاي المرة قررت أصور يمكن أشوفه أحسن.. طبعا ما شفتش اشي بس صرت بالغروب.
بس قبل ما أحطلكو الصور ، فيه صورة لإيناس عن شهب البرشاويات ..انسيت أحطها من قبل :/ ... انا ما شفت الشهب و مش عارفة هو هيك كان شكلهم ولا إيدي اهتزت:




وهاي صورة الغروب لويسبر :





وأنا بصور من السطح ضربوا المدفع عند التل .... فهاي الصورة لمحمد ..لو دققت بالصورة بتشوف دخان المدفع :





وهاي الصورة عجبتني فهي الكو كلكو :)



هناك 16 تعليقًا:

Whisper يقول...

كل رمضان وانت بالف خير
وربنا يقدرنا ان نضلنا بنفس الهمّه مش بس لنهايه رمضان...وبعده كمان :)

يسلمووو عالصوره...انا بس قرأت كلمه غروب نزلت اشوف الصوره قبل ما اخلص قرأه :) واخر صوره بتجنن

الشهب للاسف مش طالعين معي :$

Whisper يقول...

عملت zoom وبينو :)
يااااي جد حلوين
يسلمو يا قمر :)

allouh يقول...

شكراً على الصورة :)
ما كنت اعرف انهم بعدهم بيضربوا المدفع، رمضام كريم :)

حسام كراسنه يقول...

رمضان كريم، وكل سنة وانت سالمة
والله يقدرنا على قيام رمضان ان شاء الله
"بعدهم بضربو مدفع رمضان....! في اربد توقف تقريباً 8 سنين اذا مش أكثر، بعدين السنة الماضية اعتقد الجيش تبرع بمدفع، واستخدموه بس هالسنة ما في مدفع"، رمضان اله نكهة خاصة بالمدفع :)

Amjad Wadiِ يقول...

مرحبا دريمي

رمضان كريم و كل عام و انتي بخير

كيف كان الصيفي؟ ان شاء الله تمام ؟

eNAS يقول...

واااو
والله كنت رح ابعتلك ايميل اسالك فيه عن الغيبة
رمضان كريم , وصيام مقبول امين
وشكرااكتييير على شهب البرشاويات
:)
كتير انبسكت انو لساتم متذكرة
وانو يومها فعلا طلعتي على السطح وصورتيهم :)
هاي الصورة حفظتها عندي وسميتها باسمك

انا اشتقتلك دريمي . ويمكن ما اشوفك من هون للفصل الجديد ان شاء الله
بتمنالك التوفيق بشغلك وديري بالك على حالك :)

Rana Al Sha'bani يقول...

كل عام وانت بخير. لا شدي حيلك برمضان هاي السنة، ولا تنسي تجهزي قائمة دعوات، وخلي معك المصحف دائما. الله يوفقنا جميعا=)

Dreamy Villager يقول...

Whisper...
وأنت بألف خير يا رب..وإن شاء الله نظلنا نشيطين على طول.
الله يسلمك .. وأنا أصور اتذكرتك وقلت لحالي لازم أصورلك صورة خصوصي :)
شكرا على رفع معنوياتي ؛)


allouh...
العفو :)
والله أنا مش فاهمة..ليلة واحد رمضان ضربوه يمكن 5 مرات..بعدين كأنهم وقفوا..شكلهم خلصوا الذخيرة تبعتو بأول يوم ؛)


حسام كراسنه...
وأنت بألف خير وصحة وسلامة..والله يقدرنا على الطاعات ..آمين.
محمد علوه كان حكى عن انهم بطلوا يضربوا المدفع فأنا استغربت لما شفته..بس كأنه زي ما أنت حكيت ما رح يستخدموه..واللي صار أول يوم كان تجربة... شكرا على التوضيح :)

Dreamy Villager يقول...

Amjad Wadi...
سأهلا وسهلا شرفتنا :)
وأنت بألف خير وينعاد علينا وعليك.
بالنسبة للصيفي..أنا خلصت من الجامعة إلي زمان ..بس كنت أداوم بالصيف تدريب..وبصراحة كان متعب :/
شكرا على سؤالك .


eNAS...
رمضان كريم علينا كلنا وكل عام وأنت بألف خير :)
آسفة على التأخير.. بس النسيان والكسل كان الهم دور كبير...يومها طلعت أصور على الساعة 2 باليل بعد ما البطارية انشحنت..خفت حدا يشوفني وقتها ويشك فيي ؛)
إن شاء الله منشوف بعض بعد رمضان..والله يوفقك ويخليكي يا رب :)


Rana Al Sha'bani ...
وأنت بألف خير وصحة وسلامة :)
إن شاء الله بشد حيلي أكثر..وفعلا لازم أستغل المواصلات الطويلة وأقرأ فيها قرآن.
الله يوفقنا..آمين

mais يقول...

ramdaaan kareem :D

jehan يقول...

kl 3am wanty b5eer w s7a w salameh
al-photos kteer 7lween bs sho no3 your camera ??

Dreamy Villager يقول...

mais ...
رمضان كريم وكل عام وأنت بخير وصحة وسلامة.
شرفتيني بزيارتك :)


jehan ...
وأنت بألف خير وصحة وسلامة.
شكرا عيونك الحلوين :)
نوع الكاميرا Canon SX100 IS.

Rana Al Sha'bani يقول...

كيفك دريمي؟ امبارح شفت القمر كان شكله رائع سبحان الله وتذكرتك فكان نفسي أصورلك إياه+)

orangee يقول...

رمضان كريم ولو إنها متأخره :)

XTR يقول...

I wish I could finish reading the Quran even once

Dreamy Villager يقول...

Rana Al Sha'bani...
أنا الحمدلله تمام..وبعتذر كثير على التأخر بالرد..بس ما بلاقي وقت فاضي.
حلو والله ... صار القمر يذكرك فيي :)
وخلص اعتبري الصورة وصلت والله يسلمك يا رب .


orangee ...
رمضان كريم وكل عام وانت وأهلك والكل بألف خير.
لا متأخرة ولا اشي :) شرفتي و"تعالي كل يوم" ؛)


XTR...
مالك فضحت حالك ؟ :) زمان لما ما كنت اختم القرآن كنت ما أرضى أحكي لحدا عن الموضوع عشان الفضايح.
بس لا.. إن شاء الله انك رح تختمه ، اعتبره تحدي بيني وبينك..وعلى فكرة أنا بطيئة بالتلاوة.
وكل عام وأنت بألف خير.