السبت، 11 تموز، 2009

أفكار عن الزواج

بعد ما كتبت ويسبر موضوع هون ..ومن ورا سلسلتها ومواضيع مياسي عن العرسان .. والسوالف اللي الواحد بيسمعها هون وهناك عن الجيزة..قررت أكتب تساؤلاتي.

هل الزواج ضروري؟ ..أو بالأصح شو لازم تكون دوافعه؟ انه الواحد بده يستقر ..أو الواحد جاي عباله يحب ويجوز..ولا بده ييجيه أولاد..ولا بده يكون استقلاليته بتكوين عيلة.. ولا بده يخلص من الناس اللي حواليه.

ليش كل الناس بحبوا يجيبوا سيرة العرايس للشب أو يسألوه : ما لقيتش عروس؟ أو خليهم يدورولك !.. وقدام البنت كل حكيهم فلانة اتجوزت واحد كبير بالسن أو مادياته مش كثير ( أو اي اشي ) علشان بدها تتجوز أو هي كبرت وبدها تنستر (كأنها كاينه صايعة) وهالسوالف اللي بتقهر..واللي بقهر فيها طريقة العرض.. وانه أساسا البنت مش بايدها هالموضوع .. والشب مش عارف يلاقي بنت الحلال اللي يوافقوا عليها كل العيلة.
مثلا ..كل ما عمي يشوف حدا من عيلتنا بيسأل: ما لقيتوش عروس لفلان (اللي هو أخوي).. وبوجهلي الحكي انه ليش ما بدورله بما اني بعرف وبشوف بنات...الجواب بكون دايما انه أخوي ما بده (هو هيك بحكي) وأساسا أنا مش مستعدة أدورله لأنه المواصفات اللي بده اياها مش عاجبيتني :) ..والله ،لما الواحد يدور لحدا ثاني بكون يدور على زوقه هو بس بعرفش ليش الكل بطنش هاي الحقيقة..ويستمروا بالتفكير بعرايس أو عرسان لناس ثانيين.. ويذكروا أهلهم انه يجوزوا ولادهم .. شو فكرهم انه الأهل ناسيين أو ما خطرتلهم الفكرة .. او ناويين يحتفظوا باولادهم الهم للأبد.. أو انه يمكن الشب مستحي يقول انه بده يتجوز .. يعني بالله ما استحاش من كل الأشياء اللي بيعملها واجا عهاي واستحى.

فأنا والله بتساءل.. يعني لو انا ما اجانيش النصيب شو بصير بالدنيا؟ هيني عايشة عند أهلي ومبسوطة عالآخر الحمدلله .. والجيزة كلها وجع راس (دايما هيك اللي بشوفه .. خصوصي الناس اللي بدهم غيرهم يتجوزوا بحسهمش عايشين هالسعادة لحتى يقنعوا غيرهم بالموضوع)..
ومرات بحكي لحالي انه لازم الكل يتجوز هاي سنة الحياة.. وانت شو بدك تظللي عايشة بهالدنيا اذا ما ظللك حدا (أساسا هاي هي الفكرة اللي بلعبوا عليها مع البنات دايما).. أو أتجوز واحد كويس وأعيش معاه مبسوطة بس كيف بدي ألاقيه .. وأساسا شو هي المواصفات اللي بتخللي حدا كويس (بس هذا موضوع ثاني وكبير)..

يعني من الآخر اللي ما اتزوجش شو راح عليه؟
هو بالله حدا يحكيلي..لأني صايرة أفكر بدون ما أصل لنتيجة.

**************************

للي حاب ينسى القرف اللي حطيته فيه يقرأ شو لقيت عند علاء الدين عن هالموضوع.

وبالآخر شكرا كثير يا ويسبر ..لأنه عن جد فشيت قلبي D:

هناك 13 تعليقًا:

مياسي يقول...

والله ما بعرف شو بدي أحكيلك لأنو أنـا تقريبا بنفس الميمعه النفسيه!!

مش عارفه؛ بس بقدر أحكيلك انو قبل يوم سألت تلات ستات بعرفهم متزوجات اذا بيندموا على الزواج حكوا لي أبدا!!!

مؤخرا بلشت أفكر بالآتي: هو الزواج مش سهل؛ فيكي تحكي هي نقله كبيره نوعا ما-والحمدلله المجتمع بيعملها نهاية الحياه يعني تقريبا جيزه نصرانيه خصوصا للبنت- بس ولا وحده متجوزه حكت لي انها ما عانت شوي بأول حياتها!!!

يعني برضك بضل مش عارفه بس عم بشاركك خلاصة أفكاري:)

Dreamy Villager يقول...

مياسي..حتى لو ما حكيتيلي جواب مباشر..فكرة انه حدا بيتساءل زيي مريحة..شكرا الك.

Naryat يقول...

jayeetek jayeetek bel7aki... bs 5allini arawe7 o afta7 laptopi eli feyo fonts 3arabi o befesh el 2alb lol

Naryat يقول...

و الله يا عزيزتي يبدولي انو كلنا بالهوا سوا :-)
انا كمان بسأل حالي نفس الأسئلة دائماً... ضروري البني ادم يتجوز عشان يكون مبسوط؟
انا شخصياً ما اظن!!
مو سهل بالنسبة الي اقنع حالي بأي واحد و السلام بس مشان اتجوز...
عجبني تعليقك: "تتجوز مشان تنستر... ليش هي كانت صايعة؟" فعلاً!! ليش مجتمعنا ما بيشوف البنت الها قيمة الا اذا كانت مأنغجة بزلمة؟ طيب نكون صريحين... (و بدون ما حدا من الشباب يزعل!! الحكي مش عنكم هه!! و اللي بدو عنجد يستفيد يقيس الحكس عحالو بينو و بين حالو...) تلت ارباع زلام المجتمع لسا عندهم الأفكار الرجعية اياها... يا اما ما بدو مرتو تشتغل مشان بيغار عليها... يا اما بدو اياها تشتغل و تساعدو، بس ويييين!! بتضل هي المرة و هو الزلمة!! يعني ما بيصير ينقص عليه اشي!! و ما بيسير يمد ايدو يساعد ولااا بشلن... و معظمعهم مش فاهم من القوامة الا انو مرتو ما بصير تطلع بدون اذنو... و انو رقبتها بايدو و اذا زعلتو بسحب منها التصريح و بيحبسها بالبيت، و بيطلعلو و بيكون زلمة!!
و كتير منهم بيتحسس ازا مرتو سبقتو بالدراسة او ترقت بالشغل و هو لأ... او ازا مرتو كان عندها هوايات، بصير يتحجج انها بتلتهي عنو و ما بتهتم فيو... و معظمهم مقتنعين انو المراة هي اللي لازم دايماً تساير و تداري، و هو بيطلعلو يحكي شو ما بدو...
و كتير منهم بدور عاللي دارسة تعليم عالي مشان يشوف حالو فيها و انو هو -اسم الله عليه- ابو زيد خالو و جاب المهرة بزلوميتو...
يااااا شييخة!!
ازا ما كان الزواج عن قناعة بلا منو...
و انا برأيي عانس بكرامتها و لا متجوزة عحساب الكرامة و ماء الوجه!
الحياة مو سهلة... و انو تنين الهم خمسة و عشرين تلاتين سنة عايشين كل واحد ببيت شكل و بيئة شكل و افكار شكل مش سهل... و اللي بيفكر انهم رح يتفقوا بسهولة و بدون مشاكل بيكون سطحي و متوهم، مشان هيك لازم يكون في قناعة تامة بالطرف التاني و مشاعر... مشاعر كتييييير مشان حتى لو الطرف التاني غلط بدون قصد او لأنو لسا ما بيعرف الواحد منيح رصيد المشاعر هاد يخليه يتجاوز عن غلطتو و يقلو: "كرامة لعيونك، انا مين عندي بالدنيا اغلى منك؟"
فعزيزتي طبيعي انك تتساءلي :-)
و انا كمان تساءلت متلك... و بكزب عليكي ازا بقلك اني ضامنة اطبق كل شي حكيتو هون... بس تجربتي المتواضعة لهلأ هون وصلتني... و بنضل كلنا تلاميذ بهالمدرسة الكبيرة اللي اسمها الحياة :-)
و دمتي بودّ (على طريقة المنتديات لووول) 3>

Naryat يقول...

تصحيح:
و اللي بدو عنجد يستفيد يقيس الحكي* عحالو بينو و بين حالو

Naryat يقول...

تصحيح:
و اللي بدو عنجد يستفيد يقيس الحكي* عحالو بينو و بين حالو

Dreamy Villager يقول...

أنا فكرة انه اثنين مش متوافقين اجتماعيا أو علميا أو اي اشي ويوخذوا بعض مش هاضميتها بالمرة...بحس انه الفوارق بينهم بالمستقبل رح تكبر..ففعلا زي ما حكيتي لازم يكون فيه رصيد كبير لحتى يقدروا ينجحوا..بس كمان رح يكون فيه خلل بالعلاقة.
وبالنسبة لنظرة الزلام بالزواج ودور المرأة فيه..فحسب اللي حكيتيه رح يكون فيه مشكلة عن جد اذا أغلبهم هيك بفكروا بقرارة نفسهم..هو ممكن انه الواحد يغير رأيه بمواقف أو حالات معينة..بس عن جد شو اللي مستقر بباله أساسا هو المشكلة واللي مش رح ينعرف الا بعد ما يفوت الوقت.

وبدي أرجع للي حكته مياسي انه الزواج نقلة كبيرة..فعلا وبده تنازلات عشان الحياة تنجح..بس بشوف البنات تنازلاتهم أكثر ..أو يمكن ما بشوف جانب الشباب فما ببين مهم.

Ahmad M. Al-Mahrouq يقول...

الزواج متل ما بقولوها شر لا بد منه ... يعني ما حدا بقدر يكمل حياته بدون شريك .. لآنه أهله مش دايميين له ... لكن بالنهاية كل شيئ قسمة و نصيب ... وانا برأيي انو النظرة لعمر الزواج تغيرت ... وكل ما كان الشب والبنت اكبر ... كل ما كان احسن ... يعني بال 29 ل 32 انا برأيي احسن عمر للزواج ... بكون كل واحد اسس حاله .. عاش عمر العزوبية ع كيفه ... وبعدين لاحق ل هم العيلة والزواج ... بجيبله هالولدين وبكفي !!!

Whisper يقول...

لاااااااااا هاد وانا مريضه وبعيده عن النت صايره اشياء كتيره من وراي :)

هم البنات للممات...هاي المقوله اللي ماشيين عليها مع ان هالايام معظم البيوت بكونو الاخوان متغربين وهالبنات همه اللي قايمين و متحملين هم العيله

يعني هلأ بس البنت تتزوج وتكون مش مبسوطه مع زوجها وعيشتها نكد بكونو الاهل مرتاحين؟؟
تخيلي ان في اهالي بكونو مرتاحين :) وقريب جدا راح اكتب عن هالموضوع

يعني زي ما حكو الصبايا المهم انه في الها زوج حتى لو كان زي الزفت

ما بننكر انها سنه الحياه وما بننكر ان ما في بنت على وجه الارض ما بتتمنى اولا يكون عندهم اولاد وثانيا يكون في شخص بحياتها يحبها و يحترمها, بس هاتي تلاقي هالشخص اللي بستاهلها :$

Naryat

شو عانس ما عانس يختي
ما سمعتي انت شو قررو يسموهم
حراااااااااااااااائر :)

XTR يقول...

Marriage is like eating with chopsticks; it looks easy until your try it . So unless both of them do tolerate and understand each other, it won't work out.

Good luck with finding your soul mate!

Dreamy Villager يقول...

أحمد.."عاش عمر العزوبية ع كيفه" ..بعرفش ليش اتخيلت واحد هامل عالآخر وبده يعمل العجليب بس لأنه عرف انه بده يتزوج :)

ويسبر.. شايفة شو بصير من وراكِ، احنا ما مننترك لحالنا..لازم تظلي تراقبينا ؛)واحنا منستنا موضوعك بشغف.. وبصراحة في أهل حرام اللي بيعملوه ببناتهم وأولادهم.

XTR..مرحبا في مدونتي :) وشكرا إلك وان شاء الله منفرح بعرسك بس اعزمنا ؛)

أحمد وويسبر وXTR..أنا معكم تماما باللي حكيتوه ..يعني الزواج الدين حث عليه وهو فطرة الانسان مجبول عليها..بس اللي مش قادرة أستوعبه ليش الناس بتخلي الزواج هدف بالدنيا ..مع انه الواحد لازم يفكر بالآخرة ويختار شريك حياته على هالأساس وانهم يكونوا متوافقين على أنهم يساعدوا بعض ويعملوا خير مش بس إلهم .. ولغيرهم ..وهيك بحققوا الهدف من الحياة كلها ؟!
بس اللي شايفيته الواحد بده يتزوج وبده طريقة يجيب فيها مصاري علشان يعرف يعيّش عيلته وإذا الطرف الآخر مش عاجبه يبلط البحر.

الله يعين الناس ويهدينا ويوفقنا :)

sozan يقول...

اول مره بادخل التدوينه لانه الموضوع شدني بالبدايه انا متزوجه وعندي طفلين
يعني راح احكي من تجربه ويمكن ما تكون واسعه لكن بتضل تجربه
كذابه اللي بتحكيلك انها ما عانت في اول زواجها او حتى انه الحياة الزوجيه خاليه من التعب يعني من خلال تهضم الحياة مع الافندي اللي ارتبطت فيه لانه كل المواصفات اللي حاطيتها في بالك ما رح تلاقي نصها في الانسان اللي بدك ترتبطي فيه لازم يكون فيه علل متل ما انت فيكي وهيك ومتل اي علاقه العلاقه الزوجيه فيها خذ وهات ومن هون تبدأ المشاكل يا اما انه الرجال مش متقبل فكرة انه يعطي وانه يضل ياخذ او المرأة وفي نساء تتقبل الاوضاع وبتحاول تعيش ولهيك بتصير تعيسه لانها مطالبه انها تقدم في كل الاوقات والافندي ان قدم شي بتكون منه وجميله
الشي المهم اللي انا اكتشفته في الزواج انه كم من التنازلات الطرفين يقدموها وانه الاثنين واعيين لهذه التنازلات ومقدره من قبل الطرفين لانه من دون التقدير والامتنان الانسان ما بيشعر انه بيتعامل مع انسان فما بالك في زوج المفروض انه يكون حبيب
اما اهمية الزواج في انك تلاقي رفيق لدربك وهاد المفروض لكن في ناس كتير عايشه مش متزوجه وسعيده

Dreamy Villager يقول...

أكيد كونك بتحكي من تجربة اله أهمية خاصة..أساسا كل التعليقات الموجودة بتحكي عن أفكارنا الخاصة وتحليلنا لاشياء منشوفها بس أكيد فكرتنا عنها مش كاملة..أما حكيك فهو بيعطينا الجانب الآخر من الفكرة وهيك الصورة رح تصير أوضح.
وفعلا زي ما حكيتي اذا فيه طرف ما قدر التنازلات والتضحيات فالطرف الآخر رح يشعر انه خسران بهاي العلاقة..أو انها ما بتستحق يتعب علشانها.

أهلا فيكِ وشرفتي المدونة :)