السبت، 15 أغسطس 2009

ويكيبيديا .. ؟!

بعرف أنه كثير ناس بحبوا ويكيبيديا ويعتمدوا عليها بالمعلومات كثير. بس أنا ما بحبها بصراحة . وقبل ما تكرهوني ( عأساس انكم بعدكم ما كرهتوني ) خلوني أعبر عن رأيي وأقرؤوه للآخر.

أنا كثير مرات لما أكون أدوّر على معلومة بفتح على ويكيبيديا. بس فيها أشياء بتقهرني. كثير من قوانينهم بحس ما إلها معنى وبتتعارض مع المبدأ الأساسي للموسوعة و هي كونها حرة ، وأي حدا بيقدر يحرر فيها وبتتوافق مع رخصة جنو والمصادر الحرة وبعرفش شو. يعني أنا مستوعبة أنه أي مشروع لازمه قوانين تنظمه وبدون هالقوانين بتصير الأمور ضايعة والجهود ما الها فائدة. بس مش بقوانينهم اللي بطبقوها إداريين كثير من قراراتهم شخصية حسب رأيي ، وما بتخدم الهدف وبتتحول لنزاعات و جدال ما اله داعي.

أنا اجتني فترة وكتبت أكم موضوع على ويكيبيديا واتحمست الها. بس بالآخر قرفت من كثير شغلات. اذا اثنين صار بينهم خلاف بعملوا مشكلة وبقترحوا قانون جديد. واذا فيه قانون بعملوا عليه تصويت ومش أي حدا بصير أنه يصوت. وإذا إداري ما عجبه اشي بروح بطبق القانون اللي بده اياه. واذا واحد كتب سؤال بصفحة النقاش بعترضوا لأنه لازم يكتبه عند الأسئلة. واذا واحد ما عجبوا المقال المكتوب بغير فيه على كيفه ويمكن يغيره كله. يعني فتحت على موضوع كنت أنا اللي بدأت صفحته لقيته ما فيه كلمة من اللي أنا كتبتهم وكل اشي فيه متغير ، اذا حتى مغيرين طريقة كتابة التاريخ :/ يعني هاي الشغلة كثير مزعجة لما ييجي واحد يمحي اللي كتبته ويرجع يكتب زي ما بده والواحد حاس انه مجهوده ضاع.
واشي ثاني ما بحبه بويكيبيديا تابع للي كتبته فوق، أنه اي واحد بيمحي اللي مش عاجبه وبيكتب اللي هو مقتنع فيه بعتبر انه رأيه الصح. ومرات بقرروا أنهم يحطوا بالمقال الآراء المختلفة كلها ومرات لأ. أنت وحظك. علشان هيك بحس أنه مواضيعهم ما بيقدر الواحد يعتمد عليها لأنه بتكون ناقصة معلومات ومش شاملة لكل الموضوع. خصوصا بمواضيع السياسة والتاريخ واي اشي بتعلق بالثقافة. بس المعلومات العلمية فيها كثير وضعها أحسن. يعني ويكيبيديا مصدر ممتاز علشان الواحد يبدأ فيه ويوخذ فكرة عن موضوع بشكل عام ، بس ما بيقدر يعتبره مرجع وحيد وصحيح.

يوم الخميس بعرفش شو اللي وصلني على ويكيبيديا وكنت زهقانة على الآخر ، فصرت أتبايخ وشكلي عملت بلبلة. محيت صفحة من اللي مكتوب فيها ( هالة كيرليان ) وقلت لحالي مش مشكلة بيقدروا يرجعوها وعملت حركات ثانية. أنا بعتذر من الجماعة بس عن جد كنت زهقانة وحبيت أعرف كيف رح يتفاعلوا. بصراحة كنت متوقعة أنهم يرشدوني أكثر على اعتبار اني شخص ما بعرف بويكيبيديا ونازلة أكتب عجايب ، بس يعني هم كمان عندهم مليون واحد مش فاهم اشي ومش ناقصهم وحدة زيي (بعرف إني مجنونة) :





اللي بده يتمصخر علي، أو يعترض وما أعرف أرد عليه، أو أي حدا ما بعجبني اللي كتبه رح أشطب تعليقه ؛-)
بمزح :-) ( مزحي بايخ .. كمان مرة بعرف ) ، اكتبوا اللي بدكم اياه وخذوا راحتكم ، بس احتمال كبير ما أعرفش أرد عليكم. هيك أنا حاسة.

هناك 15 تعليقًا:

محمد سعيد يقول...

هههههههه.. وليه الأذية دي.. أنتي من المخربين للموسوعة وسوف يتم إيقافك
P:
هههههه

وبالمناسبة أنا كمان في فترة أصابني هوس الكتابة فيها.. وبدأت فعلا.. والحاجات اللي مش عجبتك فيها ضايقتني أنا كمان شوية..

لكن بردو الصراحة.. مع أني مكتبتش فيها كتير.. ولا حاجة تقريبا.. بس في الفترة اللي كنت بكتب فيهم.. خدت تجربة جميلة جدا.. يعني طريقة تعامل الناس فيها.. كل حاجة يعملوا لها نقاش.. ولو اتزنقت تلاقي تصويت.. يعني الديمقراطية الوحيدة اللي شفتها في بلادنا ههههه

بس من ناحية تانية.. مبالغ فيها.. ساعات بيجوا في توافه ويتناقشوا.. لحد ما الواحد بيتوه منهم وينسى الموضوع الأصلي كان أيه.. هههه

وحكاية أن حد يغير اللي أنت كاتبه وتعبان فيه.. دي رخمة جدا.. يعني الواحد كان وقته بيضيع عالفاضي.. بس دا الطبيعي.. لأن الموسوعة فكرتها كدا.. اي حد يعدل كلامك في أي وقت..

في المقابل لو دا مش عاجبك يبقى تتوجهي وتكتبي في
http://knol.google.com
هنا محدش هيعدل كلامك.

أما لو عاوزة بقى الحياد وتلاقي موسوعة (أقل تحريف) من ويكيبيديا.. عشان تقري أو تكتبي فيها.. فتوجهي لدي:
http://www.marefa.org/index.php/%D8%A7%D9%84%D8%B5%D9%81%D8%AD%D8%A9_%D8%A7%D9%84%D8%B1%D8%A6%D9%8A%D8%B3%D9%8A%D8%A9

ودمتم سالمين
:)

ملحوطة: لو شفنا الأي بي بتاعك تاني في الموسوعة.. هنعملك إيقاف

هههههه (عم بمزح، مزحي بايخ ها P:)

ههههههه

Whisper يقول...

انا شخصيا ما بستخدم الموقع الا نادرا جدا و عاده بس بدي اشوف عمله بلد او عاصمه او لغه مش اكتر, مع ان كتير ناس بحكو عن الموقع وكيف انه مفيد

وموضوع التعديل والكتابه فيه ما جربته مع انه وصلني اكتر من ايميل بشجع زياده الكتابات العربيه في الموقع :)

شجعتيني اجرب ابحبش في الموقع شوي, بس بدون تخريب لاعرف الموضوع بالزبط :)

همسة يقول...

ضحكتيني والله !!
ما جربت انا صراحة موضوع الكتابة .. بس بستخدم الموقع كتير كـ مصدر

اما قلتيلي محيتي صفحة lol !!

Dreamy Villager يقول...

محمد سعيد...
خوفتني، فكرتك واحد من الإداريين وكنت رح أشطب تعليقك P:
وأنت قلتها، ديموقراطية بس مبالغ فيها.
أخوي مرة حكالي عن knol بس ما فهمت منها اشي وكنت تاركة ويكيبيديا من فترة قصيرة فما حبيت أعيد "تجربة سيئة" :)
أما موقع "معرفة" فأول مرة بعرف عنه..وكأنه فعلا مريح أكثر من ويكيبيديا.. احتمال أجربه .. شكرا على المعلومات، غلبناك ؛)
ملحوظة:مش رح أستخدم هذا الكومبيوتر مرة ثانية لما أفتح على ويكيبيديا :)


Whisper...
هو اجت فترة الكل صار يشجع على الكتابة فيه علشان عدد مواضيعه يزداد والنسخة العربية تنافس النسخ الثانية اللي عدد مواضيعها كبير..بس حسيت انه كان الهدف انهم يكتبوا كثير وبس بحجة اثراء "المحتوى العربي بالمعرفة" :/
جربيه رح تستمتعي عن جد..إلا اذا كنت زيي واتضايقتِ من التعديلات والنقاشات الكثير..ساعتها أكيد رح تصيري تخربي ؛)


همسة...
ان شاء دايما بتظلي مبسوطة ؛)
ولا تخافي مش رح أمحي اشي ثاني علشان أضحكك :P يعني عادي صفحة وانمحت ؛)
وبنصحك أنت كمان (زي ما حكيت لويسبر ) تجربي تكتبي ..يمكن الشغلة تعجبك.


يعني صحيح أنا اتبايخت.. بس هيني بشجع على الكتابة بويكيبيديا لأجل المصلحة العامة :)

Qwaider قويدر يقول...

الفكرة انّه ويكيبيديا بتساعد الناس توصل لأوّل الفكرة. و للإستزادة، على الشخص الرجوع الى المصادر.
الحيادية غاية لا يمكن ادراكها. فكل شخص مهما حاول، لا بد ان يضفي نكهته او نكهتها على الموضوع. لا استثني احد. فهذه طبيعة بشرية.
على العموم، في حالة ويكيبيديا، خيرها اكبر من شرّها.

Dreamy Villager يقول...

قويدر...
هيك المفروض انه الناس تقرأ بشكل عام بعدين يصيروا يقرؤوا بشكل معمق من مصادر متخصصة.. بس ما حدا بحاول يستزيد بالعلم، لما يشوفوا انه المقال طويل بيعتبروه دقيق أو حتى لأنه من ويكيبيديا بيعتبروه خال من العيوب.
ما بعرف يمكن أنا كثير مقهورة من ويكيبيديا لأنهم غيرولي بالشوية اللي كتبتهم :(
عالعموم أهلا وسهلا فيك..كثير انبسطت لأنك علقت عندي :)بعرفش ليش، بس بحس انك ما بتعلق إلا لو كان فيه اشي مهم .

قط البكتريا يقول...

قززتيهم عيشتهم شكلك :D
ما بعجبوني الوكبيدين كمان ... بس الفكرة انو لازم يكون فيه كتتير تعقيدات لانو بكتبو عن مواضيع حساسه وكتتير فيه اراء متضادة ومتحاربة عليها ... عشان هيك لازم يحطو قوانبن حاسمة ... يعني مش ناقصهم يجي واحد يكب بلاه عليهم:D
وعفكرة انو موضوع انتي كاتبتيه ويتغير ... اشي مستفز لو انا مكانك بنسفهم عن الخريطه بس حظهم حلو انا مش مكانك :D

حسام كراسنه يقول...

ما بثق بالويكبيديا باللغة العربية، ما بلاقي أي اهتمام من واضعي الخبر أو الموضوع، وممكن أي شخص يخرب ويحرر على كيفه، بصراحة بفضل النسخة الانجليزية وكثير مفيدة وللتأكد من المعلومات بكون بنهاية الصفحة المراجع كاملة.

>> أي واحد زهقان بخرب :)

Dreamy Villager يقول...

قط البكتريا...
يا أهلا وسهلا :)..
كلها دقيقتين اللي ضايقتهم فيها..خليتني أحس حالي مجرمة ؛)
هو يعني ممكن الواحد يبعد عن الخلافات المضايقات ويكتب بدون ما يتدخل بحدا أو حدا يتدخل فيه..بس فعلا أكثر اشي بيضايق لما يغيروا موضوع إلك وتصير تحس انه كتابتك مش عاجبيتهم.
عشان هيك..أنت بالذات ما بنصحك تجرب تكتب عندهم، لأنك شكلك رح تضيع مجهود الآلاف :D


حسام كراسنة...
هو فيه منه هالاشي..خصوصي لما تقارن بين النسخة العربية والنسخة الانجليزية..ممكن انه تلاقي معلومات كثير ناقصة بالنسخة العربية فبيطلع المقال غريب عجيب..وبتحسه فيه خلل.. مع انهم بحاولوا يوردوا المراجع هم كمان..بس بتظل اشياء كثير ناقصة.
مش عارفة ليش حاسيتك كاين مخرب عندهم كمان..حسيتك بتحكي من تجربة :D
أهلا وسهلا فيك وشرفت المدونة :)

Ibrahim يقول...

السلام عليكم...
برأيي أن الويكيبيديا العربية قطعت شوط جيد حتى الآن ، ولكن ما زال أمامها أشواط طويلة حتى تصبح كنظيراتها من اللغات الأخرى، وهذا واجب كل شخص متعلم منا.

فلا شك أنه بأمكاننا تقديم شيء مهما كان بسيط للمساهمة في هذا المشروع المفيد. وكفانا جلداً للذات. وحتى لو كان هنالك أخطاء يجب أن نعمل على تجاوزها.

شكراً لطرح الموضوع في مدونتك دريمي.

Dreamy Villager يقول...

Ibrahim
وعليكم السلام ورحمة الله وبركاته.
يا سيدي رأيك على راسي، ولا تزعل ؛)
أنا بتفق معك انها قطعت شوط طويل..وفعلا هي مفيدة وبتلاقي فيها اللي بدك اياه. بس بعد تجربتي ما أظن اني أرجع اشارك فيها، لأنه الأخطاء التنظيمية اللي أزعجتني صعب اني أتجاوزها..اللهم إلا اذا صححت شوية أخطاء إملائية بلاقيها وأنا أقرأ.

بختلف معك انه من الواجب اننا نساهم فيها لأنه ويكيبيديا مش الخيار الوحيد للحصول على المعلومات..يعني لو بدنا نبحث عن معلومة رح نلاقي مواقع ثانية فيها عن هاي المعلومة..صحيح انه ثلاث أرباع المواقع بتكون ناقلة من ويكيبيديا، والربع الأخير بكون حاط معلومات غريبة وناقصة..بس يعني في خيارات ليش أحصر حالي بويكيبيديا ؟

العفو وشكرا كثير على رأيك :)

Ibrahim يقول...

مرحباً مجدداً...

والله أنا مش زعلان نهائياً بالعكس أنا فرحت لما شفت أنه في حدا كتب عن هالموضوع المهم. ﻷني من زمان حابب أكتب عن أشي قريب منه ولكن مش عارف أجمع أفكاري وأكتب أشي بيستاهل ينعرض.

أنا بخالفك بالرأي من ناحية المساهمة في الويكيبيديا العربية و الأعتماد عليها كمصدر أساسي للوصول للمعلومة ، فأنا أرى أنه يجب التعامل معها كمصدر موثوق وخيار أول للباحث عن المعلومة أو المعرفة مهما كانت. والسبب قبل فترة قصيرة كنت أتحدث مع أصدقائي عن الفرق بالبحث باللغة العربية والبحث بالأنجليزية، وكيف أنه نتائج البحث بالأنجليزية بتكون من مصادر متخصصة وكلام علمي منسق وموثق ويحتوي على المصادر والمراجع. ولكن نتائج البحث باللغة العربية بالعادة بتكون من منتديات وكتابات أشخاص وليست مواقع متخصصة ولا موثوقة.

طبعاً الحديث هون عن البحث عن المعلومة بشكل عام (يعني مش بس الويكيبيديا ومعلوماتها). ولكن يجب أن تكون نظرتنا للويكيبيديا مبنية على أساس إيجاد مرجع موثوق يقدم المراجع والمصادر وليس مجرد كلام عام بحيث يمكن المواطن العربي من الحصول على المعلومة الدقيقة والصحيحة.

الموضوع شائك وكبير ، وعلى ما يبدو أنا متحمس أكثر مما يجب :) فأعذريني على الأطالة ووجع الراس.

Dreamy Villager يقول...

Ibrahim...
مرحبتين :)
يا ريت لو تكتب عن الموضوع..حابة أقرأ وجهة نظر أخرى..وأكيد انها رح تكون بتستاهل تنعرض..حتى لو مش زي ما بدك..بس إلا ما يكون فيها أفكار جديدة.

مع أنه رأيك فيه كثير أشياء صح..بس أنا بعدني على رأيي..مش تناحة، بس يمكن مش حابة أفكر بشكل معمق وأكتشف بالآخر اني غلطانة :/

أما عن الحماس..فتحمس زي ما بدك..أصلا لازم يكون فيه واحد متحمس للفكرة..بيعطي دفعة للغير ..كمان طوّل زي ما بدك..ما فيش وجع راس أبدا ..بالعكس أنا عن نفسي بحب هاي النقاشات :)

Rana Al Sha'bani يقول...

يمكن عشانك جربت الويكيبيديا العربية، فلازم الكل يعمل حاله معلم.
عموما، المتل بيقول: اعمل الخير وارميه في البحر. ما دام حاولت تعملي إشي خير أبدا ما تزعلي. وكل عام وأنتم بخير=)

Dreamy Villager يقول...

الحمدلله كانت تجربة كويسة بويكيبيديا مش رح أندم عليها..بس حاليا مش رح أرجعلها.
وأنت بألف خير وصحة وسلامة وينعاد علينا وعليكم :)