السبت، 12 آذار 2011

يوم التدوين عن الأردن #B4JO

أول‏ ‏مرة‏ ‏بشارك‏ ‏بيوم‏ ‏التدوين‏ ‏عن‏ ‏الأردن॥ ‏;كنت بحاول أدورعلى‏ ‏موضوع‏ ‏جذاب‏ ‏أو‏ ‏فكرة‏ ‏مبتكرة‏ ‏كأول‏ ‏مشاركة‏ ‏॥ وبعد ‏ما‏ ‏يئست‏ ‏قررت‏ ‏اني‏ ‏ما‏ ‏أكتب‏ ‏وأكتفي‏ ‏بالقراءة‏ ‏والتعليق॥ ‏وفجأة‏ ‏استوعبت‏ ‏الفكرة‏ .. ‏أكتب‏ ‏اشي‏ ‏مفيد..
بحب‏ ‏الأردن‏ ‏وبحب‏ ‏طبيعتها‏ ،وبحب الناس وطبيعتهم ،بس فيه أشياء كثير مزعجة بالبلد:
- قلة التنظيم :هاي الشغلة موجودة بكل اشي، بالمواعيد ،بالزيارات، بالدور، بالمواصلات،تقريبا كل الأشياء الحكومية فيهاش تنظيم، وحتى لما يكون فيه تنظيم الكتروني (ببرنامج ونظام على الكومبيوتر) بقدروا يلاقوا طريقة يتحايلوا عليه

- الممتلكات العامة ما الها أي احترام بالبلد، كل اشي مسموح انه يتخربش عليه أو نمزع منه اشي أو نخربه بأي طريقة:الباص ،الكتاب، المباني

- الاخلاص بالعمل، قليل ما بشوف حدا بشتغل من قلب ورب، وانا منهم دايما بقول لحالي الصبح اني ما بدي أكون زي الناس اللي ما بحبهم،بس بعرفش ليش بصير اقول لحالي "هو انا الهبلة الوحيدة الي رح اشتغل هون؟!" ،وبصير زيهم، بعدين كثيرناس بيوخذوا أغراض من الشغل وبسمحوا لحالهم يتملكوها او يستفيدوا منها

- فيه أشياء ثانية ، ومنها انه ما في حقوق متساوية للجميع،فيش عدل، ومش الكل بيحصل على الخدمات اللي لازم يحصل عليها كبي آدم،فيه ناس كثير بيفتقدوا الأساسيات بالحياة ولما أفكر مرات بظروفهم بحس انه صعب كثير تتغير، ولازم نغير المجتمع كله علشانهم بس اكيد الحل أبسط من هيك

بتمنى أشوف الأردن أحسن وإن شاء الله انها بتكون هيك :)

هناك 4 تعليقات:

Whisper يقول...

مسا الفل يا قمر

هي اشياء بسيطه و لكن تكرارها بشكل
فرق كبير

موضوع سرقة - اه هي سرقها فليش نسميها بمسمى ثاني- سرقة اغراض الشغل الناس كتير بستهينو فيها, في ناس بطبعو كتب بالشغل و مش مشكله الحبر و الورق, مهو كله ببلاش وبنسو انه مش حقهم, و غيره من تطليع الابحاث و المكابس و الاقلام...

اليوم كنت بالويبده بدارة الفنون و الجو بجنن و المنظر بياخد العقل, لسا يا دوب طالعه ويلا شب من بلكونة بيته برمي ورقه مزعها 10 شقف ....كان نفسي اسأله" انت ارتحت هيك؟؟؟ استفدت شي؟؟؟" ليش هالاذى!!!

لو كل واحد عرف واجباته و عملها فاكيد حقوقه و حقوق كل الناس راح توصلهم بكل سهولة

ان شاء الله يجي هاليوم عن قريب

sozan يقول...

حلوه اول تدوينه عن الاردن :)
التغيير لازم الكل يؤمن فيه ليصير فما اعتقد ومن خلال ما اقرأ بدنا شوية وقت والخير ان شاء الله جاي لما نصير نفهم مزبوط شو يعني وطني وشو لازم اعمل من شان وطني:)

Dreamy Villager يقول...

Whisper...
مسا الورد والياسمين :‏)‏
زي الشب اللي شفتيه..فيه منه كثير ‏..هم لو بس ما يخربوا ‏..عشان ما يضيعوا وقت غيرهم بأنهم يصلحوا وراهم..بدل ما يعملوا اشي للبلد.

Sozan..
الله يسلمك،عيونك الحلوين :‏)‏
هو التغيير بده خطة واضحة ‏..مش حماس يومين..بعدين وبيعمل فوضى..وبالآخر الكل بيكسل.

Dreamy Villager يقول...

لاحظت انه الموضوع عدي بشبه كثير اللي كتبه أحمد حمدان..بس مش عارفة أعلق عنده وأقله اني والله ما سرقته منه :/